კობა კობალაძესთვის ყველა ახალი წელი გამორჩეულია. როგორც „რეპორტიორთან" საუბარში ამბობს, სხვადასხვა ახალი წელი მისთვის დაკავშირებულია შვილების, დისშვილების, მეგობრების, ნათესავების შვილების დაბადებასთან... თბილისის საკრებულოს დეპუტატი ამ დღესასწაულს თავის მრავალრიცხოვან ოჯახში ხვდება. საცივს ვერ აკეთებს, თუმცა, ახალი წლის სამზადისში მომმარაგებლის ფუნქციით აქტიურადაა ჩართული.

„ახალ წელს შევხვდი ჩემს მრავალრიცხოვან ოჯახთან ერთად, ეს ჩვენი ტრადიციაა, ყოველთვის ერთად ვიკრიბებით. შემდეგ ყველა თავისი „პროგრამის" მიხედვით მოქმედებს. როგორი ტანსაცმლით, რა გაფორმებებით შევხვდეთ ახალ წელს - ამას დიდი დრო ეთმობა ოჯახში. მაგრამ ყველა ერთად ახალ წელს ვხვდებით ახალი ხედვებით, იმედებით", - აცხადებს დეპუტატი.

კობა კობალაძე 2016 წლისგან იმ იმედებისა და იმ ნდობის გამართლებას ელის. სურს, რომ მოსახლეობაში ის ნიჰილიზმი აღარ არსებობდეს, რაც ბოლო ხანებში გაჩნდა.

რა საჩუქარს ისურვებდა თოვლის ბაბუისგან, დეპუტატი პასუხობს:

„თოვლის ბაბუისგან ვისურვებდი ნატვრისთვალს, რომ ბევრი ნატვრა შემისრულდეს მეც და ჩემს გარშემომყოფებსაც", - ამბობს კობალაძე.