ვარდების მოედანზე საშობაო ალილოს მონაწილეების შეკრება დაიწყო. ადგილზე არიან სასულიერო პირები, სტიქაროსნები და მოქალაქეები.
ვარდების მოედნის ტერიტორიაზეა დეკორატიული სპილოები, აქლემები და სხვა ცხოველები. ურმები დატვირთულია ნობათით.
თბილისის მერიის ინფორმაციით, მსვლელობის მონაწილეები გაივლიან რუსთაველის გამზირს, თავისუფლების მოედანს, პუშკინისა და ბარათაშვილის ქუჩებს, ელენე ახვლედიანის აღმართით კი პრეზიდენტის სასახლესთან მივლენ.
მსვლელობა ყოვლადწმინდა სამების ტაძარში დასრულდება, სადაც სასულიერო პირები პარაკლისს გადაიხდიან.
ალილოს მონაწილეები პარლამენტის შენობის წინ შეჩერდებიან, შემდეგ თავისუფლების მოედანზე - საკრებულოს შენობასთან, სადაც მათ დედაქალაქის მერი და საკრებულოს თავმჯდომარე ტკბილეულით დახვდებათ.
მონაწილეთა ჯგუფი "კონკადან" საპატრიარქოში შევა, სადაც მათ სრულიად საქართველოს კათოლიკოს-პატრიარქი დალოცავს და ალილოსთვის ტკბილეულს გადასცემს.
შემდეგ მსვლელობის მონაწილეები პრეზიდენტის სასახლისკენ გადაინაცვლებენ, სადაც მათ ტკბილეულს პრეზიდენტი გადასცემს და მსვლელობაში მონაწილეებს შობას მიულოცავს.
ყოვლადწმინდა სამების ტაძარში მიტანილი შემოწირულობები შემდეგ ბავშვთა სახლებსა და უმწეოთა თავშესაფრებში გადანაწილდება.
