4 იანვარს, მე-10 სართულიდან მოწყვეტილმა თოვლის მასამ მაღაზია „წიგნები ბათუმში" დააზარალა. საწყობში არსებული წიგნების ნახევარზე მეტი დასველდა და განადგურდა. სასიხარულოა ის ამბავი, რომ ძალიან ბევრ ადამიანს გაუჩნდა სურვილი წიგნების მაღაზიასა და გამომცემლობას დახმარებოდა, შედეგმაც არ დააყოვნა, ამ დროისათვის ზარალი ანაზღაურებულია.

"ზარალი ფაქტობრივად ანაზღაურებულია. ძალიან დაგვიდგა მხარში ხალხი. შეიძინეს გადარჩენილი წიგნები. ანგარიშზე უამრავმა ადამიანმა ჩაგვირიცხა თანხა და ახლა, როგორც გამოცხადდა, "ბიბლუსის" ქსელი გვეხმარება. ამიტომაც, გადავწყვიტეთ მოვუწოდოთ ხალხს, ნუღარ შეწუხდებიან, ისედაც ძალიან გვეუხერხულება ეს ყველაფერი." - განუცხადა "კარგი ამბების სააგენტოს" მაღაზიის მეპატრონე ირაკლი ბაკურაძემ.