2014 წლის ივნისში საქართველო მძლეოსნობაში ევროპის გუნდურ ჩემპიონატს უმასპინძლებს. ამ მნიშვნელოვან სპორტულ ღონისძიებასთან დაკავშირებით, საქართველოს ოფიციალური ვიზიტით, ევროპის მძლეოსნობის ფედერაციის პრეზიდენტი, ასევე შვიდი ქვეყნის: ბულგარეთის, ესტონეთის, ბელორუსის, ლატვიის, უკრაინის, აზერბაიჯანისა და სომხეთის მძლეოსნობის ფედერაციის პრეზიდენტები ეწვივნენ.
დელეგაციის წარმომადგენლებს დღეს, თბილისის მერი გიგი უგულავა შეხვდა და მათ 2014-2015 წლებში თბილისში დაგეგმილ სპორტულ ასპარეზობებთან დაკავშირებით, მიმდინარე და განხორციელებულ პროექტებზე ინფორმაცია გააცნო.
დღესვე, თბილისის მერმა საპატიო სტუმრებთან ერთად, დიღომში მძლეოსნობის ახალი სტადიონის მშენებლობას ჩაუყრა საფუძველი, რომელიც 4 000 მაყურებელზეა გათვლილი. საერთაშორისო სტანდარტების შესაბამისი ახალი მოედნის მშენებლობა 2015 წლისთვის დასრულდება.
საღამოს კი გიგი უგულავა უცხოელ სტუმრებთან ერთად, წერეთლის გამზირზე მდებარე მძლეოსნობის განახლებულ სასახლეს გახსნის, რომლის რეაბილიტაცია თბილისის მერიის დაფინანსებით განხორცილდა.
