აბაშიძეების ოჯახს სტამბოლში ნაპოვნი ჰოლანდიელი მხატვრის ვან დეიკის ნამუშევრის საკუთრებაზე პრეტენზია აქვს. როგორც ტელეკომპანია „იმედთან" საუბრისას ეკა აბაშიძემ განაცხადა, აღნიშნული ტილო მის ოჯახში წლების განმავლობაში ინახებოდა. მისივე თქმით, ყველამ იცოდა, რომ აბაშიძეები ამ ნახატს ყიდდნენ. აბაშიძეების ოჯახი „იმედს" დუაკავსირდა და განაცხადეს, რომ ნახატი 15 წლის განმავლობაში მათ მფლობელობაში იმყოფებოდა და გაყიდვის გადაწყვეტილება 2010 წელს, ფინანსური პრობლემებიის გამო მიიღეს.
"მას ჰქონდა უზარმაზარი ოქროსფერი ჩარჩო. ყველამ იცის, რომ ეს ნახატი იყო ჩვენს ოჯახში და ჩვენი იყო. მე ვიცი ინიციალები, რითაც შეიძლება ამ ნახატის ამოცნობა. ეს თუ არ იცი, ვერ მიხვდები... ყველა გადამყიდველმა და ყველამ იცოდა, რომ ჩვენ ამ ნახატს ვყიდდით. ბოლოს მოვიდა ორი ადამიანი, რომლებმაც თქვეს, რომ ჩვენ ამ ნახატს თურქეთში გავყიდითო. თანხა იმ პერიოდში სასწრაფოდ გვესაჭიროებოდა და ამიტომ მივეცით ამ ხალხს ნახატი გასაყიდად", - განაცხადა ეკა აბაშიძემ.
ეკა აბაშიძე აცხადებს, რომ როდესაც მიიღეს ტილოს გაყიდვის შესახებ გადაწყვეტილება, შეაფასებინეს ნახატი და სავარაუდო ღირებულება დადგინდა 80 ათასიდან 100 ათას დოლარამდე. აბაშიძე ამბობს, რომ, როცა მის ოჯახში ნახატის ყიდვის მსურველები მივიდნენ, მათ შორის ხელშეკრულება გაფორმდა.
"გვეჩქარებოდა და ჩვენ შევთანხმდით რაღაც თანხაზე იმიტომ, რომ სასწრაფოდ იყო ფული გადასახდელი, ანუ ეს იყო 37 ათასი დოლარი. რეალურად გადაგვიხადეს 7 ათასი ლარი თუ დოლარი არ მახსოვს... წავიდა ეს ხალხი, გაიტაცეს ეს სურათი. ეს ადამიანი სულ გვეკონტაქტებოდა ტელეფონით, იღებდა ყურმილს, მაგრამ გვატყუებდა, აი თურქეთშიაო ამბობდა. ჩვენ შევთავაზეთ, რომ მოგეხმარებით, რომ დავიბრუნოთ ჩვენი ნახატი. არაფერი აღარ გვინდა, გვინდა ჩვენი ნახატი", - განაცხადა აბაშიძემ.
როგორც ეკა აბაშიძე აცხადებს, როცა ოჯახმა ვერ მოახერხა კუთვნილი თანხის მიება, მიმართეს სასამართლოს. ადვოკატი აცხადებს, რომ სასამართლო პროცესი ოჯახის სასარგებლოდ დასრულდა.
ადვოკატის თქმით, ხელშეკრულების ხელმომწერ პირს დააკისრეს თანხის გადახდა, თუმცა რადგან გამყიდველი პირის სახელზე არ იყო არაფერი გაფორმებული, მას მხოლოდ მანქანა დაუყადაღეს.
შეგახსენებთ, თურქეთის ქალაქ სტამბოლში საქართველოდან კონტრაბანდული გზით გატანილი ჰოლანდიელი მხატვრის, ენტონი ვან დეიკის ნახატი აღმოაჩინეს.
გავრცელებული ინფორმაციით, მანამდე 14-მილიონიანი ნახატი საქართველოში სავარაუდოდ, რუსეთიდან შეიტანეს, რუსეთში კი ევროპიდან.
თურქული მედიის ცნობით, ნახატის არალეგალურად გაყიდვას ორი ბიზნესმენი ცდილობდა, რომლებიც დაკავებულები არიან.
