მსოფლიოს სხვადასხვა ქვეყანაში გრიპის ვირუსს ებრძვიან. დონბასში ვირუსს მსხვერპლი მოჰყვა. ქალაქ კრამატორსკში ორი კვირის განმავლობაში 15 ადამიანი დაიღუპა, 45 კი კრიტიკულ მდგომარეობაში რჩება.

უკრაინის ჯანდაცვის დეპარტამენტის ინფორმაციით, ქალაქის საავადმყოფოში 180 ადამიანი იმყოფება, მათ შორის 22 ბავშვი.

გრიპის ვირუსს მსხვერპლი მოჰყვა სომხეთშიც. ინფექციური დაავადებების ცენტრის ინფორმაციით, ოთხი ადამიანი დაიღუპა. ამჟამად საავადმყოფოში მძიმე ფორმებით დაავადებული 8 ადამიანი იმყოფება. ყველა პაციენტი ხელოვნური სუნთქვის აპარატზეა გადაყვანილი.

სომხეთსა და უკრაინაში ასეთი ვითარების მიუხედავად, სპეციალისტები საქართველოში მდგომარეობას სტაბილურად აფასებენ. შემოდგომიდან დღემდე გრიპის ვირუსის ლაბორატორიულად დადასტურებული მხოლოდ 23 შემთხვევა ფიქსირდება.

პრევენციის მიზნით, მაღალი რისკის კატეგორიის 10 000-ზე მეტი ადამიანი უკვე აცრილია. დაავადებათა კონტროლის ცენტრში განმარტავენ, რომ ვირუსის გავრცელების პიკს თებერვალში ელოდებიან.

წყარო