ბიძინა კუჭავას მეუღლემ მარინა ნიკოლოზაშვილმა ჟურნალისტებს განუცხადა, რომ არ ეთანხმება გამოძიების ვერსიას, რომ მისმა მეუღლემ მოკლა ვახტანგ(პაატა) ქირია და შემდეგ თავი მოიკლა.
„სანამ დასკვნა არ დაიდება, ძალიან ბევრი კითხვა იბადება. კითხვები გამაჩნია მე და ჩემს ოჯახს. გამოვრიცხავ ბიძინას თვითმკვლელობას და მის ქმედებას ქირიასთან მიმართებაში. პაატას ის ვერ მოკლავდა ვერანაირად, ჩვენ ძალიან ახლობელი ოჯახები ვართ", - განაცხადა მარინა ნიკოლოზაშვილმა.
მისივე თქმით, პროკურატურაში დაკითხვაზე თითქმის 18 საათის განმავლობაში იმყოფებოდა და მხოლოდ რამდენიმე საათის წინ გაიგო, რომ მისი მეუღლე ცოცხალი აღარ იყო.
„მე არანაირი ინფორმაცია არ გამაჩნდა", - განაცხადა ნიკოლოზაშვილმა.
შინაგან საქმეთა სამინისტრო ოფიციალურად ადასტურებს, რომ ბრალდებულმა ბიძინა კუჭავამ სამეგრელო-ზემო სვანეთის საოლქო სამხარეო პროკურორი ვახტანგ ქირია მოკლა, შემდეგ კი სიცოცხლე თვითმკვლელობით დაასრულა.
