ჟურნალისტი მაია კახიძე ნიკოლოზ ბარათაშვილის კავშირმა, საქართველოს მწერალთა ეროვნულმა აკადემიამ და თბილისის მერიის კულტურული ღონისძიებების ცენტრმა, გურამ საღარაძის სახელობის კონკურსში - " მხატვრული კითხვის დიდოსტატები" მონაწილეობისთვის დააჯილდოვა. ინფორმაციას მაია კახიძე სოციალურ ქსელში ავრცელებს:

„ძალიან, ძალიან მიხარია!

ნიკოლოზ ბარათაშვილის კავშირმა, საქართველოს მწერალთა ეროვნულმა აკადემიამ და თბილისის მერიის კულტურული ღონისძიებების ცენტრმა, გურამ საღარაძის სახელობის კონკურსში - " მხატვრული კითხვის დიდოსტატები" მონაწილეობისთვის დამაჯილდოვა.

ბედნიერი ვარ უპირველესად იმიტომ, რომ სიტყვის დიდოსტატს, ბატონ გურამ საღარაძეს პირადად ვიცნობდი, განსაკუთრებულ პატივს ვცემდი და აი, მხვდა პატივი, კიდევ მოვფერებოდი მის ხსოვნას.

მისმა წასვლამ ძალიან დამასევდიანა. გავბედე და ლექსი დავუწერე იმ ზღვა სიყვარულით, როგორც მიყვარდა ეს გამორჩეული ქართველი! მისი მუდამ მჯეროდა, რადგან ურთირთობაში, სპექტაკლებში თუ ზღაპრულ პოეზიაში ისეთი ხმა იღვრებოდა, სულს რომ მთლიანად ამოგიბრუნებდა და აგაცრემლებდა, გაგაღიმებდა, დაგაიმედებდა, აგაფორიაქებდა... დაგაფიქრებდა... თუმცა, დღესაც ზუსტად ასეა, მის ჩანაწერებს რომ ვუსმენ.

მე სწორედ მისი ქართულით გავიზარდე, მისი გამორჩეული და განუმეორებელი ხმით. ბედნიერი ვარ, ძალიან ბედნიერი! ვიდექი სცენაზე და ასე მეგონა, ბატონ გურამს ესმოდა ჩემი ხმა... მე კი მისი... აი, ის ლექსიც...", - წერს მაია კახიძე და აზიარებს ლექსს.

შენი ხმა გულზე მეფინა ღმერთად

*****************************************

(გურამ საღარაძეს)

კალამთან ისევ ჩამოჯდა სიტყვა

და კალმახივით მისველებს სხეულს,

შენი სტროფების მოვიდა სეტყვა,

ჟრუანტელად რომ აცვივა რვეულს.

თორმეტი მთვარე მინათებს ღამეს,

ვიცი, ლექსებში რამდენი გითქვამს,

მეც სტრიქონებით გიამბობ ამბებს

და არითმიას დავუთვლი რითმას.

მე რა ხანია სიტყვებში ვცხოვრობ,

კალამთან ისევ ჩამოჯდა სიტყვა...

შევისახელე ფიქრი და ვცოცხლობ,

შენთვის ვისწავლე ლექსების კითხვა.

შენ ამ ქალაქში ცხოვრობდი ადრე,

შენი ხმა გულზე მეფინა ღმერთად,

გამზირზე ისევ დაგიკრეფ ვარდებს,

ლექსი დამირჩა აქ შენთან ერთად.

მთვარის ფუსფუსში მგონი თენდება

და შემერითმა სტრიქონთა ფეთქვა,

სისხამზე მზე რომ გაიზმორება...

მიყვარხარ - მეთქი, მომინდა მეთქვა.

/მაია კახიძე/