სირიაში საქართველოს ორი მოქალაქე დაიღუპა. გარდაცვლილები არიან 24 წლის რამზან ფარეულიძე და 22 წლის მუხმად თურქოშვილი. ორივე მათგანი სირიაში დაახლოებით ერთი წლის წინ წავიდა.
აღნიშნულთან დაკავშირებით იუსტიციის მინისტრი თეა წულუკიანი აკეთებს განმარტებას და ამბობს, რომ მას შემდეგ, რაც ტერორიზმთან დაკავშირებით კანონი გამკაცრდა, ნაკლები პრობლემებია ჩვენი მოქალაქეების პანკისიდან სხვა ქვეყნებში საომრად გასვლასთან დაკავშირებით. წულუკიანის ინფორმაციით, პრობლემა ჯერ-ჯერობით მაინც არსებობს.
"როდესაც კანონი გამკაცრდა, მას მერე ნაკლები პრობლემებია ჩვენი მოქალაქეების პანკისიდან სხვა ქვეყნებში საომრად გასვლასთან დაკავშირებით, თუმცა პრობლემა არსებობს. ეს ორი ადამიანი, როგორც ჩანს, მრავალი თვის წინ არის გასული საქართველოდან. მე მინდა მათ ოჯახებს მივუსამძიმრო და ყველა ახალგაზრდას მოვუწოდო, საკუთარი ქვეყნის მომავლის საქართველოში მშენებლობისკენ და არა ტერორიზმის მიზნით ბრძოლისკენ, რადგან ეს არის ის დიდი სენი და დანაშაული, რომელსაც ჩვენ საერთაშორისო თანამშრომლობის ფარგლებში ვებრძვით.
ახალგაზრდებმა ალბათ, საკუთარ მომავალზე უნდა იზრუნონ, ჩაერთონ იმ საგანმანათლებლო პროგრამებში, რომელიც მათ შორის პანკისის ხეობაში არსებობს. იფიქრონ ნათელ მომავალზე, ვიდრე ბოროტების მსახურებაზე", - განაცხადა თეა წულუკიანმა.
