დღეს, 27 იანვარს, საქართველოს ეროვნული ბანკის საბჭოს წევრობის კანდიდატურების  წარდგენის ვადა იწურება.

20 იანვარს საქართველოს პრეზიდენტის ადმინისტრაციის უფროსმა გიორგი აბაშიშვილმა განაცხადა: - „შევჯერდით, რომ  27 იანვარი არის ბოლო ვადა, როდესაც შესაძლებელია,  წარვადგინოთ ეროვნული ბანკის საბჭოს წევრობის კანდიდატურა".

კრიტერიუმები, რომელიც კანდიდატს უნდა ახასიათებდეს არის - განათლება, პროფესიული გამოცდილება და პოლიტიკური მიუკერძოებლობა.

„ვფიქრობთ, რომ პირველ ეტაპს ამ ნაწილში ჩვენ  სწრაფად გავივლით, ამის შემდეგ  პრეზიდენტს წარედგინება კანდიდატურები და ის დაასახელებს ერთ-ერთ მათგანს, დღეს იყო გარკვეულ კანდიდატურებზე საუბარი, თუმცა ამაზე საბოლოო ჯამში ვისაუბრებთ 27 იანვარს", - განაცხადა აბაშიშვილმა.

საქართველოს ეროვნული ბანკის პრეზიდენტს, გიორგი ქადაგიძეს ვადა 2016 წლის თებერვალში ეწურება. ბანკის ახალი ხელმძღვანელი საბჭოს წევრებიდან უნდა შეირჩეს. ოთხი შესაძლო კანდიდატის ვინაობა უკვე ცნობილია - გიორგი ბაქრაძე, ნია შარაშიძე,  არჩილ იაკობაშვილი და გიორგი ფაილოძე.