ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე დეპუტატ ალექსანდრე ქანთარიას განცხადებას გამოეხმაურა, რომ საქართველოს საგარეო საქმეთა მინისტრ მიხეილ ჯანელიძეს თავის რუს კოლეგასთან შეხვედრისთვის საკმარისი გამოცდილება არ გააჩნია.
მისი თქმით, მიხეილ ჯანელიძის კომპეტენციაში ეჭვის შეტანა მხოლოდ იმაზე მიანიშნებს, რომ მის კომპეტენციას არ იცნობენ
„მე ამ განცხადებას არ გავცნობივარ, მაგრამ კომპეტენციაში ეჭვის შეტანა მხოლოდ იმაზე მიანიშნებს, რომ არ იცნობენ ამ პიროვნებას, არ იცნობენ მის კომპეტენციას. მიხეილ ჯანელიძე არის ძალიან კომპეტენტური, მათ შორის, სწორედ საგარეო პოლიტიკური კურსის განხორციელების თვალსაზრისით", - განაცხადა დავით ბაქრაძემ.
მისივე თქმით, საქართველოს მხარე ყოველთვის მზად არის რუსეთთან დიალოგისთვის და მთავარი საკითხი ქვეყნის სუვერენიტეტი და ტერიტორიული მთლიანობაა.
