NATO-ს გენერალური მდივნის იენს სტოლტენბერგის ყოველწლიურ, 2015 წლის ანგარიშში, რომელიც ალიანსის ვებ-გვერდზე ცოტა ხნის წინ გამოქვეყნდა, საქართველოს დიდი ადგილი ეთმობა. ანგარიშში ნათქვამია, რომ რუსეთი განაგრძობს საქართველოს ნაწილების უკანონო ოკუპაციას.

დოკუმენტში ნათქვამია, რომ ბოლო წლების განმავლობაში, რუსეთმა NATO-ს საზღვრებთან სამხედრო აქტიურობა მნიშვნელოვნად გაზარდა და მოახდინა დემონსტრირება, რომ მზად არის, საკუთარი საგარეო და თავდაცვითი პოლიტიკური მიზნების განსახორციელებლად ძალა გამოიყენოს.

„რუსეთმა ძალა საქართველოში 2008 წელს გამოიყენა", - ნათქვამია დოკუმენტში.

2015 წლის NATO-ს ანგარიშში ასევე ჩამოთვლილია გასული წლის განმავლობაში NATO-სა და მისი მოკავშირეების მიერ ჩატარებული სამხედრო წვრთნები, ასევე აღნიშნულია, რომ 5-20 ივნისს ბალტიისპირეთში გამართულ მასშტაბურ საზღვაო წვრთნებში ქართველმა სამხედროებმაც მიიღეს მონაწილეობა.

საკვანძო სამხედრო წვრთნებს შორის დასახელებულია საქართველოში, 2015 წლის 8-22 ივლისს ჩატარებული მრავალეროვნული წვრთნებიც, რომელშიც ქართველების გარდა, მონაწილეობა მიიღო 800-ზე მეტმა სამხედრომ ბულგარეთიდან, ლატვიიდან, ლიტვიდან, რუმინეთიდან და აშშ-დან.

ყოველწლიურ ანგარიშში აღნიშნულია ისიც, რომ გასულ წელს ჩატარდა არაერთი საკონსულტაციო შეხვედრა NATO-სა და მის მოკავშირეებს შორის, მათ შორის საქართველოშიც.

დოკუმენტის თანახმად, NATO ასევე მუშაობდა ევროკავშირთან, აღმოსავლეთ პარტნიორობის პროგრამის პარტნიორთა, მათ შორის საქართველოს მხარდასაჭერად.

ანგარიშში, სადაც NATO-ს პარტნიორებზეა საუბარი, დეტალურადაა განმარტებული NATO-ს აქტივობები ღია კარის პოლიტიკის ფარგლებში და ამ კონტექსტში საქართველოცაა ნახსენები.

დოკუმენტში ნათქვამია, რომ დეკემბრის დასაწყისში გამართულ შეხვედრაზე NATO-ს საგარეო საქმეთა მინისტრებმა კიდევ ერთხელ დაადასტურეს მათი მტკიცე მხარდაჭერა საქართველოს წევრობის მისწრაფებისადმი და მოუწოდეს განახორციელოს წევრობისთვის საჭირო რეფორმები, ასევე დაადასტურეს NATO-ს მხარდაჭერა ამ ძალისხმევისადმი.

„ალიანსმა 2015 წელს დაადასტურა მისი ერთგულება ღია კარის პოლიტიკისადმი. NATO-ს კარი ღიაა ყველა ევროპული დემოკრატიისთვის, რომელიც ალიანსის ფასეულობებს იზიარებს, მზად არიან და შეუძლიათ აიღოს წევრობის პასუხისმგებლობა და ვალდებულებები", - ნათქვამია დოკუმენტში.

ყოველწლიურ ანგარიშში ნათქვამია, რომ გასულ წელს NATO-მ რიგი სიახლე შემოიღო, რამაც მისცა გარკვეულ ქვეყნებს, მათ შორის საქართველოს უფრო ღრმა თანამშრომლობის შესაძლებლობა.