უფლებადამცველი გელა ნიკოლაიშვილი „რეპორტიორთან" საუბარში აცახდებს, რომ 2008 წლის ომის გამოძიება საკმაოდ რთული იქნება, რადგან ზოგიერთი მტკიცებულება უკვე აღარ არსებობს. თუმცა მიიჩნევს, რომ გამოძიების პროცესში მაინც მრავალი დანაშაული გამოიკვეთება. შეგახსნებეთ, რომ ჰააგის სასამართლომ პროკურორ ფატუ ბენსუდას 2008 წლის ომის მოვლენების გამოძიების უფლება მისცა.
„ზოგადად ამდენი წლის შემდეგ ძალიან რთულია, თუნდაც ასეთი მასშტაბური დანაშაულის გამოძიება, როგორიც აგვისტოს ომია. რადგან ზოგ შემთხვევაში მტკიცებულებები გამქრალია, ზოგიერთი მონაწილე ცოცხალიც აღარ არის. ზუსტად გამოძიება საკმაოდ რთული იქნება, თუ ვინ იყო კონკრეტული დანაშაულის მონაწილე და ვისი ბრძანება იყო გაცემული. ამასთან მგონია, რომ ქართველი მოსახლეობის ეთნოწმენდას ადვილად დაადასტურებს ეს სასამართლო. რაც შეეხება მაღალჩინოსნების პასუხისმგებლობას, ბუნებრივია, როდესაც ომი მიმდინარეობს იქ დიდი ალბათობით, რომ ორივე მხარიდან ხდებოდა სამხედრო დანაშაული კაცობრიობის წინააღმდეგ, რომელიც ძირითადად ეხება მშვიდობიანი მოსახლეობის და სამხედრო ტყვეების მიმართ არაადამიანურ მოქცევას და განხორცილებულ სამხედრო ოპერაციებს. არ არის გამორიცხული, რომ ერთი მხრიდანაც და მეორე მხრიდანაც რაღაც გამოიკვეთოს, თუმცა ობიექტურად, რუსეთისა და ოსეთის მხრიდან ჩადენილ დანაშაულებზე უფრო მეტი მასალები არსებობს, რაზეც ვფიქრობ, სასამართლო მეტ აქცენტს გააკეთებს. გამორიცხული არც ქართული მხარის წარმომადგენლების მხრიდან ჩადენილი დანაშაულის გამოკვეთაა, თუმცა ვფიქრობ, ამის უფრო ნაკლები შანსი არსებობს", - აცხადებს ნიკოლაიშვილი.
