„ოჯახი არის ქალისა და მამაკაცის ერთობა" - საქართველოს კონსტიტუციაში ამ ტიპის ჩანაწერის გაკეთება აბსოლუტურად შეთავსებადია და არ ეწინააღმდეგება ანტიდისკრიმინაციული კანონს", - ამის შესახებ „რეპორტიორს" პარლამენტარმა ელისო ჩაფიძემ განუცხადა.
მისი თქმით, ამ თემაზე მმართველ პოლიტიკურ გუნდში დებატები გამართულა და გადაწყვეტილებაც მიღებულია.
„ეს თემა აქტუალური გახდა იმ საკონსტიტუციო სარჩელიდან გამომდინარე, რომელიც სასამართლოში შევიდა და რომელიც ერთსქესიანთა ქორწინებასთან დაკავშირებულ პრობლემებზეა. მე, რა თქმა უნდა, თავს შევიკავებდი რაიმე კონკრეტული ვთქვა ამ სარჩელთან დაკავშირებით, რადგანაც ეს სასამართლოს განსახილველი თემაა. თუმცა ვფიქრობ, რომ ჩვენ აქტიურად უნდა დავიწყოთ მუშაობა, რომ ეს ჩანაწერი გაკეთდეს საქართველოს კონსტიტუციაში და ამით დასრულდეს ის დებატები, რომელიც მიმდინარეობს საზოგადოებაში. დარწმუნებული ვარ, პარლამენტი მხარს დაუჭერს ამ ჩანაწერის გაკეთებას და ასევე დარწმუნებული ვარ, რომ ამის მომხრე იქნება ქართული საზოგადოების ძალიან დიდი ნაწილი", - განაცხადა ჩაფიძემ.
