„მე არ ვარ პლუტარქე, რომ შედარებითი ბიოგრაფიები ვწერო ან ერთი პრემიერის, ან მეორესი", - განაცხადა ტელეკომპანია „TV პირველის" ეთერში საქართველოს პრეზიდენტმა გიორგი მარგველაშვილმა.
„მე ბატონი კვირიკაშვილის მიერ ვხედავ წინ გადადგმულ სახელმწიფოებრივ ნაბიჯებს, რომელიც მიმართულია იმისკენ, რომ უფრო დავასტაბილუროთ პოლიტიკური ვითარება", - აღნიშნა მარგველაშვილმა.
პრეზიდენტის განცხადებით უმჯობესი იქნებოდა, გიორგი კვირიკაშვილს არა იმის შესახებ ესაუბრა, ესწრება თუ არა პარლამენტში პრეზიდენტის გამოსვლას, არამედ უმჯობესია საუბარი გამოსვლას დაეთმოს.
"უმჯობესია ვისაუბროთ არა იმის თაობაზე მოვიდა თუ არა კონკრეტული პირი ისეთ მნიშვნელოვან შეხვედრაზე, როგორიც არის უშიშროების საბჭო, არამედ ვისაუბროთ იმაზე, რა გააკეთა უშიშროების საბჭომ. ვისაუბროთ არა იმაზე, რომელმა პოლიტიკოსმა ენამოსწრებულად მეორეზე რამე თქვა, რომლის უკანაც შეურაცხყოფის მეტი არაფერი დგას, არამედ ვისაუბროთ იმაზე, რომ რანაირად მოახერხეს პოლიტიკოსებმა ქვეყნის უკეთესად მუშაობა. ეს მეც, პრემიერ-მინისტრსაც, მინისტრებსაც ბევრად უფრო რთულ ვითარებაში გვაყენებს, რათა ვისაუბროთ იმაზე თუ რა გავაკეთეთ", - აღნიშნა პრეზიდენტმა.
გიორგი მარგველაშვილის თქმით, კვირიკაშვილთან აქვს კომუნიკაცია და ურთიერთობა, რომელიც მედიით არ შუქდება.
