საგარეო ურთიერთობათა კომიტეტის თავმჯდომარე თედო ჯაფარიძე „კვირის პალიტრასთან" გიგი უგულავასთან დაკავშირებით, ევროსაბჭოს ახალარჩეული პრეზიდენტის პედრო აგრამუნტის განცხადებას აფასებს და აღნიშნავს, რომ მისი მწვავე პასუხის მიუხედავად, აგრამუნტსა და მას შორის დამოკიდებულება და ურთიერთობა არ დაძაბულა.
ჯაფარიძის განცხადებით, სამწუხაროა, რომ ოპოზიციის კონკრეტული წარმომადგენლები ევროპის წარმომადგენლებთან საქართველოს იმიჯს ლახავს.
„ჩვენ ხელწამოსარტყმელი ბავშვები არ ვართ. ამიტომ ნაჩქარევ და ცალმხრივ ინფორმაციაზე დაყრდნობით გაკეთებულ დასკვნებს ასე მარტივად ნურავინ გააკეთებს. კიდევ ერთი რამ: მე პირადად ბევრჯერ მითქვამს, რომ საქართველოში არ არის სულყოფილი დემოკრატია, ჯერ კიდევ გვაქვს ბევრი ხარვეზი, მაგრამ ჩვენი სტრატეგიული მიზანია დემოკრატიული, კანონის უზენაესობაზე დაფუძნებული, სამართლიანი სახელმწიფოს აშენება, რომელშიც ინსტიტუტები და კანონები განსაზღვრავენ პოლიტიკურ პროცესებს და არა პიროვნებები. ძალიან საწყენია, რომ ოპოზიციის ზოგიერთი წარმომადგენელი, ასე ვთქვათ, „კარდაკარ" დადის და საკუთარ ქვეყანაზე დეზინფორმაციას ავრცელებს."
