ტელეკომპანია „მაესტროს" 55-პროცენტიანი წილის მფლობელი გია გაჩეჩილაძე ამბობს, რომ 50- მილიონიანი ვალის შესახებ არაფერი იცის.

"ეს ციფრები საიდან მოაქვთ, გაუგებარია. ჩვენ საქმეში არავინ გვახედებდა. მგონია, რომ გაკოტრება მიზანმიმართულად ხდებოდა. ალბათ, გაკოტრების საფუძველზე ჩვენი წილიდან გაშვებას, ტელევიზიის აქტივების ახალ კომპანიაში გადატანას და მერე, ერთი-ორი კვირის დაფუძნებული კომპანიის გაყიდვას აპირებდნენ,"- აღნიშნა გაჩეჩილაძემ გადაცემა 2030-ში საუბრისას.

„ტელევიზიაში აუდიტით უნდა შევიდეთ და დავითვალოთ, ეს თანხები სად მიდიოდა. კოტე გოგელიას გარდა, „მაესტროს" ყველა დამფუძნებლისთვის გაუგებარი სიტუაციაა, 5 წლის განმავლობაში დამფუძნებელთა კრება არ ჩატარებულა. მაკა ასათიანი და კოტე გოგელია კომუნიკაციაზე არ მოდიოდნენ. ღლონტის პოზიცია როგორია, არ ვიცი. ბაია გადაბაძესთან კომუნიკაცია მქონდა და მიკვირს, ასეთ განცხადებებს რატომ აკეთებს. პატარკაციშვილების ოჯახს „მაესტროში" არანაირი ინტერესი არ აქვს. მათ უნდათ, რომ „მაესტრომ" ძველი სახელი დაიბრუნოს. „მაესტრომ", რომელიც მართალ სიტყვასთან ასოცირდებოდა, რეიტინგი დაკარგა. ამათ არ უნდათ, „მაესტრო" კარგი ტელევიზია იყოს, თორემ კარგ ჟურნალისტებს რომ უშვებ, რომლებსაც არხისთვის რეიტინგი და შემოსავალი მოაქვთ, ეს რატომ უნდა გააკეთო",-აღნიშნა გია გაჩეჩილაძემ.