„მაესტროს" პარტნიორთა კრების დაწყებამდე ტელეკომპანია „მაესტროს" დამფუძნებლის მამუკა ღლონტის წარმომადგენლის, ადვოკატ პაატა კიკვიძის განცხადებით, მამუკა ღლონტის პოზიციაა, რომ ამ ეტაპზე ტელეკომპანიის დირექტორის გადადგომის საფუძველი არ იკვეთება.
კიკვიძის ინფორმაციით, დღევანდელ შეხვედრაზე განიხილება როგორც დირექტორის გადაყენების საკითხი, ასევე პარტნიორის გარიცხვის საკითხი. თუმცა რომელ პარტნიორზეა საუბარი, ადვოკატს არ დაუკონკრეტებია. არსებული ინფორმაციით კი, საუბარია გია გაჩეჩილაძის გარიცხვაზე.
„არ ვიცი, როგორ განვითარდება პარტნიორთა კრება. მამუკა ღლონტის პოზიციაა, რომ ამ ეტაპზე დირექტორის გადაყენების საფუძველი არ იკვეთება. წილების გადანაწილების საკითხი დირექტორის გადაყენებასთან არანაირ კავშირში არ არის. წილების საკითხს პარტნიორები იხილავენ, თუმცა, ამას შემხებლობა არ აქვს მენეჯმენტთან", - განაცხადა პაატა კიკვიძემ.
მამუკა ღლონტი საქართველოში არ იმყოფება და პარტნიორთა კრებაზე მის პოზიციას ღლონტის ადვოკატი პაატა კიკვიძე დააფიქსირებს.
ტელეკომპანია „მაესტროს" გენერალური დირექტორი ბაია გადაბაძე პრემიერ-მინისტრ გიორგი კვირიკაშვილთან შეხვედრას ითხოვს.
