ანალიტიკოსი არჩილ გამზარდია ილიაუნის ლექტორ გიორგი მაისურაძის განცხადებას ეხმაურება და აცხადებს, რომ ლექტორის მხრიდან „სახეზე გვაქვს რელიგიური ნიშნით დისკრიმინაცია". ამის შესახებ გამზარდია საკუთარ „facebook"-გვერდზე წერს და უფლებადამცველებს გიორგი მაისურაძის განცხადებაზე შესაბამისი რეაგირებისკენ მოუწოდებს.
„სულ გაჭედეს ამათ? სახეზე გვაქვს რელიგიური ნიშნით დისკრიმინაცია. იმედია, უფლებადამცველები მოითხოვენ შესაბამისი ღონისძიებების გატარებას, ილიაუნის ადმინისტრაცია უნდა გაემიჯნოს ამას და საზოგადოებას, სტუდენტობას ბოდიში მოუხადონ. აღნიშნული პედაგოგი კი არ უნდა მუშაობდეს უმაღლეს სასწავლებელში, როგორც დისკრიმინატორი", - წერს გამხარდია.
გიორგი მაისურაძის განცხადებით, მართლმადიდებლობას იერიში მიაქვს თავისუფალ სიტყვაზე და მანამ არ მოისვენებს, სანამ მართლმადიდებლობას საბოლოოდ არ დაასრულებს.
„დღეს მართლმადიდებლობას იერიში მიაქვს თავისუფალ სიტყვაზე, თვითონ თავისუფლების უწმინდეს იდეაზე. არა საპატრიარქოს, არა რომელიმე მღვდელმსახურს, არა პარლამენტს და პოლიტიკურ პარტიებს, არამედ, პირველ რიგში, სწორედ - მართლმადიდებლობას, ამ შავბნელ, რუსულ, იმპერიალისტურ იდეოლოგიას. სწორედ მართლმადიდებლობა, და არა რომელიმე ორგანიზაცია ან პიროვნება, არის მთავარი წინაღობა საქართველოში დასავლური ფასეულობების საბოლოოდ დამკვიდრებისა. და ყველა მისი მიმდევარი სინათლის და პროგრესის ცნობიერი თუ გაუთვითცნობიერებელი მტერია. ამიტომ ჩვენ, ლიბერალები, საქართველოს ინტელექტუალური ელიტა, საქართველოს ჭეშმარიტი პატრიოტები, ვიბრძოლებთ ბოლომდე და ყველა კანონიერი საშუალებით, სანამ საბოლოოდ არ დავასრულებთ ამ ანტიპროგრესულ, ანტიცივილურ იდეას საქართველოში, ამ სიბნელის, აგრესიის და უძრაობის დასაყრდენს მართლმადიდებლური რწმენის სახით", - წერს მაისურაძე.
***
(მოამზადა ნენე სტეფანიშვილმა)
