ტელეკომპანია „მაესტროს" ერთ-ერთი დამფუძნებლის ბაჩო კიკაბიძის განცხადებით, მის მფლობელობაში არსებულმა „მაესტრო 24"-მა ფუნქციონირება „TV 11"-ის სიხშირეზე დაიწყო.

კითხვაზე - მოხდება თუ არა „მაესტრო 24"-ში ტელეკომპანია „მაესტროს" კადრების გადაყვანა, კიკაბიძემ განაცხადა, რომ გადასვლას შესთავაზებს, ვისაც ექნება სურვილი და ვისაც ჩათვლის საჭიროდ.

„მე ვარ დამოუკიდებელი კომპანია, მაქვს ავტორიზაცია, ვიყავი მარეგულირებელ კომისიაში და შევატყობინე, რომ ვიწყებ ტრანსლირებას და ეს არის საცდელი მაუწყებლობა. ამ წუთებში ოდნავ შეზღუდულია მაუწყებლობა დაფარვის კუთხით, „მაესტრო 24" არის აბსოლუტურად სხვა არხი და მასში მუშაობას შევთავაზებ, ვისაც ექნება სურვილი და ვისაც ჩავთვლი საჭიროდ. მაუწყებლობა დავიწყე დღეიდან. ქალბატონ ბაია გადაბაძესთან მაქვს მოლაპარაკებები და შეიძლება, აქვე ვიქირავო კუთხე ან სხვა შენობაში", - განაცხადა ბაჩო კიკაბიძემ.