პარლამენტის თავმჯდომარის მოადგილის გუბაზ სანიკიძის განცხადებით საქართველო ქრისტიანული სახელმწიფოა და ამიტომ, რიგი ადამიანების მიერ გაკეთებული განცხადებები, რომელიც მართლმადიდებლობას შეურაცხყოფს, შესაძლოა დაპირისპირების საგანი გახდეს.
სანიკიძე საზოგადოებას მოუწოდებს, რელიგიური თემების შესახებ ღია განცხადებების გაკეთებისგან თავი შეიკავონ, რადგან დღევანდელ მსოფლიოში რელიგიური კუთხით ძალიან ბევრი და დიდი დაპირისპირებები მიმდინარეობს.
„საქართველო ქრისტიუნული სახელმწიფოა თავისი ფესვებით, ისტორიითა და განვითარებით. ქართველი ხალხის ჩამოყალიბებაში გადამწყვეტი როლი ითამაშა ქრისტიანულმა ფასეულობებმა, საერთოდ ბიბლიურმა ფასეულობებმა.
რაც შეეხება იმას, ერევა თუ არა ეკლესია სახელმწიფოს საქმიანობაში, ეკლესია არ ერევა სახელმწიფოს საქმიანობაში. მე რამდენადაც ვიცი, საქართველო ყველაზე მძიმე მდგომარეობაში როდესაც იყო, დაშლილი, დანაწევრებული და გადანაწილებული სხვადასხვა სახელმწიფოების ქვეშ, ერთადერთი ერთობა რომელმაც ჩვენ დღემდე სული მოგვატანინა, ეს იყო ქართული ეკლესია. ამიტომ ყველას მოვუწოდებ- ჩემო ძვირფასო მეგობრებო, თუ გადავავლებთ თვალს დღევანდელ მსოფლიოს, ძალიან სენსიტიურია რელიგიური საკითხები და თუ ავარიდებთ ამას თავს, ძალიან კარგი იქნება."- განაცხადა სანიკიძემ გადაცემაში „პრიორიტეტი"
