„პატრიოტთა ალიანსის" ლიდერი ირმა ინაშვილი წინა ხელისუფლებასა და „ნაციონალური მოძრაობის" თანამდებობის პირებს იხსენებს, რომლებიც დღესაც დაუსჯელები დადიან „ქართული ოცნების" დაპირების მიუხედავად.

ინაშვილის თქმით,  2012 წლის ოქტომბერში აზრადაც კი ვერ გაივლებდა, რომ წინა რეჟიმის ძალოვები, რომლებიც საზოგადოებას მწარედ უსწორდებოდნენ, დღეს დაუსჯელები იქნებოდნენ.

„სოციალური ქსელი ყოველდღიურად გვახსენებს, სად ვიყავით და რა შინაარსის პოსტებს ვავრცელებდით ბოლო წლების მანძილზე. დავიჯერო, ერთი ცალი მშვიდი დღე არ მქონია, აქციის, მიტინგის, დარბევის, წართმევის, უსამართლობის... სტრესის და ნერვების გლეჯის გარეშე?  მქონდა...  2012 წლის ოქტომბერში იყო ეს დღე.

მაგრამ მაშინ ფიქრადაც კი ვერ გავივლებდი, რომ ბოროტი რეჟიმის ბოროტი თავები ამავე რეჟიმის მსხვერპლად გამოცხადდებოდნენ. ასეთი კოშმარული აზრი რომ გაგიჩნდეს, მინიმუმ კოხტა კოდუა უნდა იყო. გავიგეთ, ქართველი ხალხი აწამებდა მეგის ქარდავას! ქართველი ხალხი აუთოვებდა ვანო მერაბიშვილს! ქართველ ხალხს ჰყავდა უგულავა დამწყვდეული ვირთხებით სავსე ორმოში! ქართველი ხალხია დამნაშავე! დამნაშავე ვართ, რომ ამ მარაზმს ვიტანთ.

მართალი და მტყუანი, შავი და მწვანე, მებრძოლი და კურდღელი დღეს ერთ ტაფაზე შიშხინებს... თუმცა, რომელ ერთ ტაფაზე?! ტაფაზე სწორედ მებრძოლი და მართალი ხალხი იხრუკება, ხოლო ვაზელინმომარაგებულები, ასევე, სადისტ-მანიაკები თავს გადასარევად გრძნობენ. ეჰ, ოცნებაო, ჩემო... ძველო, საბანი კარგად ამოუკეცე მორიგ უმანკოსა მას- მურუსუძეს, არ გაცივდეს. მერე უკვირთ, რატომ არ სძინავს ნახევარ საქართველოსო. ამ უკიდეგანო  უსამართლობასა და განურჩევლობაში ცხოველი ვერ დაიძინებს, არა თუ ადამიანი."- აღნიშნავს ინაშვილი.