„მეოცე საუკუნის ქართული ინტელექტუალური საზოგადოების ყველა თაობა ვალშია დედა-უნივერსიტეტის წინაშე..." - გთავაზობთ ისტორიკოს სერგო ვარდოსანიძის facebook-სტატუსს:
„98 წლის წინათ, თებერვლის დასაწყისში დიდი მღელვარება იყო რუსეთისა და ევროპის წამყვანი უნივერსიტეტებიდან დაბრუნებულ ქართველ სწავლულებში, ისინი მსჯელობდნენ უკანასკნელ დეტალებზე, საბოლოოდ შეთანმხდნენ - 8 თებერვალს (ძველი სტილით, 26 იანვარს) წმიდა მეფე დავით აღმაშენებლის ხსენების დღეს, თბილისში სათავადაზნაურო გიმნაზიის შენობაში გაიხსნებოდა კავკასიაში პირველი ევროპული დონის ქართული უმაღლესი საგანმანათლებლო კერა, თბილისის უნივერსიტეტი...
უნივერსიტეტის პირველ რექტორად აირჩიეს პროფესორი პეტრე მელიქიშვილი, უნივერსიტეტის მთავარი მესაძირკვლე იყო ივანე ჯავახიშვილი, უნივერსიტეტი დალოცა და სამადლობელი პარაკლისი აღასრულა სრულიად საქართველოს კათოლიკოს-პატრიარქმა უწმიდესმა და უნეტარესმა კირიონ მეორემ.
მეოცე საუკუნის ქართული ინტელექტუალური საზოგადოების ყველა თაობა ვალშია დედა-უნივერსიტეტის წინაშე... მარადიული სასუფეველი უნივერსიტეტის დამაარსებელთ, მადლობა და სიხარული უნივერსიტეტის დამფასებელთ, მოამაგეთ და იქ მოღვაწე პროფესორ-მასწავლებელთ, სტუდენტებს", - წერს სერგო ვარდოსანიძე.
მოამზადა სალომე ჯანდიერმა
