ლევილის მამულის საქართველოსთვის გადაცემა საუკუნის წინ, თავად ქართველი ემიგრანტების მიერ შეძენილ ფრანგულ მიწაზე, ლევილის შატოს პირველი რესპუბლიკის დარბაზში გაფორმდა. ლევილის მამულის საქართველოსთვის გადმოცემის მნიშვნელობაზე„რეპორტიორთან" პარლამენტის წევრი ზაზა პაპუაშვილი საუბრობს. მისი თქმით, ძალიან დიდი ბედნიერებაა, რომ ჩვენს მეგობარ ქვეყანაში, საფრანგეთში არსებობს მამული, რომელსაც ქართველთა სახელი ჰქვია.
„ძალიან მნიშვნელოვანია, რომ ლევილის მამული საქართველოს დაუბრუნდება. სამწუხაროდ, მე ლევილში არ ვყოფილვარ, სიამოვნებით მოვინახულებდი და სიღრმისეულად გავეცნობოდი. ძალიან დიდი ბედნიერებაა, რომ ჩვენს მეგობარ ქვეყანაში, საფრანგეთში არსებობს მამული, რომელსაც ქართველთა სახელი ჰქვია. საქართველოსთვის ეს ისტორიის ფურცლის არდავიწყება და არგაქრობაა. გარდა იმისა, რომ მამულის გადმოცემა მატერიალური მოცემულობაა, ეს არის დოკუმენტი, თუ რის გამო აღმოჩნდნენ დევნილები საფრანგეთში და როგორ მოღვაწეობდნენ. ეს დოკუმენტია, თუ როგორ უყურებენ დღევანდელი ხელისუფლების წარმომადგენლები მომავალს და როგორ იცავენ ჩვენს ისტორიას.
ეს არის მამული, რომელიც შეიძინეს, მოუარეს, საფრთხე ემუქრებოდა ეპოქების ქარტეხილში, დღეს ეს მამული ჩვენთვის ხელმისაწვდომი და საკვლევადაც მარტივია. ჩვენ გვაქვს სახლი საფრანგეთში და ეს სიმბოლურადაც მნიშვნელოვანია ჩვენი ქვეყნის ისტორიისთვის", - ამბობს პაპუაშვილი.
