საქართველოს განათლების მინისტრის, თამარ სანიკიძის განცხადებით ერთ-ერთი არასამთავრობოს მიერ მცირე ტირაჟით დაბეჭდილ წიგნებს - "კომპასი" და "კომპასიტო", საგანმანათლებლო სისტემასთან არავითარი კავშირი არ აქვს. ამის შესახებ სანიკიძემ გადაცემაში 2030 ისაუბრა.
„ადამიანებს, რომლებიც რელიგიის სახელით საუბრობენ, ავიწყდებათ, რომ ჩვენი რელიგია ტყუილს და ცილისწამებას კრძალავს. განათლების სამინისტროს ვებგვერდზე ეს წიგნები განთავსებული არასოდეს ყოფილა. მსმენია, რომ 2009 წელს, ერთ-ერთი საჯარო სამართლის იურიდიული პირის ვებგვერდზე დროებით განთავსდა. მაჩვენოს ვინმემ ამ წიგნებზე გაცემული ჩემი ბრძანება. სასკოლო სივრცეში სახელმძღვანელოს მოხვედრის სხვა ლეგალური გზა არ არსებობს",- აღნიშნა განათლების მინისტრმა.
„ვერ ვიჯერებ, რატომ ვერავინ, მათ შორის, საპატრიარქოს წარმომადგენლებმა ვერ აღმოაჩინეს საკითხები, რომლებიც უსაფრთხო სექსსა და მამათმავლობას უკავშირდება და როგორ აღმოაჩინა მხოლოდ ორმა ადამიანმა?! საგნის არც ერთ ვერსიაში მსგავსი არაფერი წერია. პოლიტიკოსები ახალგაზრდობასთან დაკავშირებული საკითხებით მანიპულირებას არ ერიდებიან-ხოლმე, მაგრამ ახლა იერიში მესამე-მეოთხე კლასელებზე მიიტანეს. ეს სახელმწიფო ინსტიტუტების, განათლების სისტემის დისკრედიტაციას ემსახურება და თუ ცილისწამება არ დასრულდება, ბოლოს და ბოლოს სასამართლოში ვიჩივლებთ",- განახცადა თამარ სანიკიძემ.
