„ვერცერთი გონიერი ადამიანი საქართველოში ვერ იტყვის, რომ რუსული პროპაგანდაა მოძალებული", - ასე ეხმაურება ანალიტიკოსი დემურ გიორხელიძე აშშ-ის დაზვერვის სამსახურის ხელმძღვანელის ჯეიმს კლეპერის განცხადებას. როგორც გიორხელიძემ „რეპორტიორის" პრესკლუბში გამართულ ბრიფინგზე განაცხადა, მას პრორუსულობად არ მიაჩნია ფაქტი, რომ საქართველოს ხელისუფლება ცდილობს, რუსეთთან დიალოგი დაამყაროს.
„კლეპერის მინიშნებაში არის თითქოსდა რუსული პროპაგანდის გაძლიერებაზე საუბარი, მაგრამ ვერცერთი გონიერი ადამიანი საქართველოში ვერ იტყვის, რომ რაღაც განსაკუთრებული ხდებოდეს ან რუსული პროპაგანდა იყოს მოძალებული. საქართველოში არ არსებობენ სერიოზული პოლიტიკური ძალები, რომლებსაც შეიძლება ჰქონდეთ ქვეყანაში საკმარისი გავლენა, რომ რუსულ ორიენტაციას გაუწიონ პროპაგანდა. უფრო მაშინებს ის, რომ პრორუსობა აქ შეიძლება იყოს გამოყენებული პროვოკაციად, როდესაც შეიძლება თითქოსდა ორიენტაციის შეცვლის შიშით გარკვეულმა ძალებმა ხელისუფლების დამხობა მოისურვონ. ის, რომ გარკვეული ადამიანები რუსეთთან ურთიერთობის მოწესრიგებაზე საუბრობენ, პრორუსულობა არ არის, ეს საღი აზრია. საქართველოს განვითარება არ უწერია, თუ მას საფრთხე ჩრდილოეთიდან არ მოეხსნა. ამიტომ, რუსეთზე საუბარს როდესაც პრორუსობას არქმევ, ეს არის მიზანმიმართული პროვოკაცია და ქვეყნის საწინააღმდეგო პროპაგანდა. ეს ყველაფერი შეიძლება გამოყენებულ იქნას ოქტომბერში, საარჩევნო ვითარების ასარევად, რომ თითქოსდა საქართველო რუსეთისკენ გარბის და პროდასავლურმა ძალამ ხელისუფლების დამხობა მოინდომოს", - განაცხადა გიორხელიძემ.
