„სამოქალაქო ჩართულობის ცენტრის" დამფუძნებელს ლევან გოგიჩაიშვილს არასამთავრობო ორგანიზაციების გარკვეულ ნაწილთან კითხვები აქვს. როგორც გოგიჩაიშვილმა „რეპორტიორის" პრესკლუბში გამართულ ბრიფინგზე განაცხადა, მას აინტერესებს, თუ რატომ უჭერს მხარს არასამთავრობო სექტორი რუსეთის მოქალაქე კოტე გოგელიას, რომელმაც მაღალი ნდობის მქონე ჟურნალისტები ტელეკომპანიიდან გაუშვა.

„ძალიან უცნაურია გარკვეული არასამთავრობო ორგანიზაციების პოზიცია ტელეკომპანია „მაესტროში" მიმდინარე პროცესებთან დაკავშირებით. განსაკუთრებით უცნაურია „საერთაშორისო  გამჭვირვალობა - საქართველოს", სამოქალაქო  განვითარების  სააგენტოს (CIDA), სამართლიანი  არჩევნებისა და დემოკრატიის  საერთაშორისო  საზოგადოების (ISFID) პოზიციები. როდესაც გოგელიას მხრიდან ხდებოდა ჟურნალისტების გაშვება, ეს ორგანიზაციები აპროტესტებდნენ ამ ფაქტს და მიიჩნევდნენ, რომ გოგელია სარედაქციო პოლიტიკაში ერეოდა. სწორედ გოგელიას მიაწერდნენ საზოგადოებაში მაღალი ნდობის მქონე ჟურნალისტების არხიდან გაშვებას. ისინი აღშფოთებულები იყვნენ „მაესტროში" მაშინ მიმდინარე პროცესებით. რა შეიცვალა დღეს, როდესაც ერთი წლის შემდეგ, ეს ადამიანები აღმოჩნდნენ რუსეთის მოქალაქე გოგელიას მხარდამჭერები? ეს ადამიანები არ უდგებიან საკითხს გულწრფელად. ამ ყველაფერს უყურებენ ზედაპირულად და არიან პოლიტიკურად ანგაჟირებულები ამ ყველაფრის მიმართ", - განაცხადა გოგიჩაიშვილმა.