„ჟურნალისტების პოლიტიკური და ბიზნეს-თვითნებობისგან დაცვის საკანონმდებლო მექანიზმი უნდა შევიმუშაოთ“, - აღნიშნული ინიციატივით „საქართველოს განვითარების ფონდის“ წარმომადგენელი ხათუნა ლაგაზიძე გამოდის. როგორც ლაგაზიძემ „რეპორტიორის“ პრესკლუბში გამართულ ბრიფინგზე განაცხადა, თუკი ჟურნალისტების დაცვას კანონი უზრუნველყოფს, ეს მედიის თავისუფლების გარანტიაც იქნება.
„ჟურნალისტების დაცვის მექანიზმი საქართველოში არ არის. ვიღაცების ახირებებით ხდება ყველაფერი ქართულ მედიაში. ვფიქრობ, დროა, სამოქალაქო საზოგადოება ინიციატივით გამოვიდეთ, რომ ჟურნალისტების პოლიტიკური და ბიზნეს-თვითნებობისგან დაცვის საკანონმდებლო მექანიზმები შევიმუშაოთ. ვფიქრობ, საქართველოს პარლამენტი ამ მიმართულებით თუ ნაბიჯებს გადადგამს, ეს იქნება ერთ-ერთი ყველაზე მნიშვნელოვანი კანონი, რაც განაპირობებს ჟურნალისტების სოციალურ და პროფესიულ დაცულობას. ეს ყველაფერი კი ქართული მედიის თავისუფლებას განაპირობებს. დროა, ახალ რეალობაზე გადავიდეთ და ეს რეალობა გახლავთ ჟურნალისტების სოციალური დაცვის საკანონმდებლო უზრუნველყოფა, არამარტო პოლიტიკოსებისგან, არამედ მედიამფლობელთაგანაც“, - განაცხადა ხათუნა ლაგაზიძემ.
