The Washington Post-ი საქართველოს შესახებ სტატიას აქვეყნებს. „საქართველოს დასავლური კურსი", - ეს სათაური აქვს წამძღვარებული ჯექსონ დიელის მასალას.
ავტორის თქმით, "ვარდების რევოლუციას" ერთი წლის შემდეგ უკრაინული "ნარინჯისფერი რევოლუცია" მოჰყვა, ქარიზმატული სააკაშვილი კი საქართველოს პრეზიდენტი და პროდასავლური ცვლილებების სიმბოლო გახდა, რომელიც სძულდათ მოსკოვში, თუმცა, აღმერთებდნენ ვაშინგტონში.
ჯექსონ დიელი წერს, რომ ათი წლის შემდეგ ეს ტალღა ჩაცხრა. გასულ კვირას უკრაინამ, რომელსაც იგივე აგრესიული პოლიტიკური ძალა უდგას სათავეში, თავის დროზე "ნარინჯისფერმა რევოლუციამ" რომ დაამხო, ევროკავშირთან ასოცირების ხელშეკრულების შეთანხმებაზე უარი თქვა და პუტინის კრემლს ჩაეხუტა. უკრაინამდე სომხეთი იყო, რომელიც რამდენიმე თვის წინ პუტინის ძლიერ ზეწოლას დანებდა. ახლა ევროკავშირთან შეთანხმების გაფორმებას, დემოკრატიასა და თავისუფალ ბაზარს მხოლოდ მოლდოვა და სააკაშვილის საქართველო ითხოვენ.
"მეორე საპრეზიდენტო ვადის ამოწურვის შემდეგ, სააკაშვილი ისევ იქ დაბრუნდა, საიდანაც დაიწყო - შეერთებულ შტატებში. სააკაშვილს აღარ წყალობენ სამშობლოში და არც ვაშინგტონში, სადაც ობამას მმართველობის პერიოდში, საქართველოს და სხვა პოსტსაბჭოთა ქვეყნებსაც დიდ ყურადღებას აღარ უთმობენ", - წერს ჯექსონ დიელი.
სტატიის ავტორი ასევე აღნიშნავს, რომ საქართველოს ევროპისკენ მიმართული მერყევი კურსი ქვეყნის გარეთ მყოფ მის ექს-პრეზიდენტზეა დამოკიდებული, ასე რომ ავტოკრატულობისკენ მიდრეკილი მთავრობა, რომელმაც ის ჩაანაცვლა, ვერ დააპატიმრებს მას. "მე თუ დამაპატიმრებენ, ეს საქართველოს ევროპასთან ინტეგრაციის დასასრული იქნება", - ციტირებს ავტორი გასულ კვირას, ვაშინგტონში მყოფი მიხეილ სააკაშვილის მასთან გაკეთებულ კომენტარს.
ავტორი ასევე წერს, რომ ხშირად ოპონენტების დაშინებაში სააკაშვილის მთავრობას ადანაშაულებდნენ. არჩევნებში მისი პარტიის მარცხი კი ნაწილობრივ ციხეში პატიმართა შეურაცხყოფის სკანდალმა გამოიწვია. მაგრამ, ექს-პრეზიდენტი მზად არის აღიაროს "შეცდომები".
სტატიის ავტორი აღნიშნავს, რომ სააკაშვილი ხელახლა იწყებს ცხოვრების აღმოჩენას, როგორც აშშ-ის ანონიმური სტუმარი. "ხელმეორედ გავახალგაზრდავდი. ფაქტობრივად, ნულიდან ვიწყებ. მე არ ვარ დაღლილი და არც დასვენება მჭირდება. თუმცა, ჩემგან დასვენება ჩემს ხალხს სჭირდება", - ციტირებს ავტორი მიხეილ სააკაშვილის კომენტარს.
