სპეცდანიშნულების რაზმმა "ბერკუტმა" რეზინის ხელკეტების გამოყენებით კიევში, დამოუკიდებლობის მოედანზე უკრაინის ევროინტეგრაციის მომხრეები დაარბია. ამის შესახებ, უკრაინული მედია იუწყება.

გვიან ღამით დამოუკიდებლობის მოედანზე დარჩენილი ათასამდე ადამიანის წინააღმდეგ "ბერკუტმა" ცრემლსადენი გაზიც გამოიყენა.

აქციის ერთ-ერთი ორგანიზატორის განცხადებით, მომიტინგეებს რეზინის ხელკეტებს ურტყამდნენ, აქციის რამდენიმე მონაწილე სერიოზულად დაშავდა. უკრაინელი დეპუტატის, ანდრეი შევჩენკოს განცხადებით, ათეულობით სტუდენტია დაკავებული.

უკრაინული მედიის ცნობით, კიევის მილიციის განცხადებით, მიტინგის დარბევის გადაწყვეტილება დამოუკიდებლობის მოედანზე ხშირი კანონდარღვევის გამო მიიღეს.