იაპონიის დედაქალაქ ტოკიოში შეკრებაზე მყოფი საქართველოს ახალგაზრდული ნაკრების წევრებმა ცუკუბას უნივერსიტეტის საცხოვრებელში შიდაგანაწესი დაარღვიეს, რის გამოც, გუნდი, საქართველოში ვადაზე ადრე დააბრუნეს. როგორც მასპინძლებმა ბრძანეს, ქართველები მუსიკას ძალიან ხმამაღლა უსმენდნენ და ველოსიპედით დასაშვებზე ჩქარა გადაადგილდებოდნენ; ამას გარდა ერთმა მათგანმა სასტუმროში ცეცხლმაქრი საშუალება უნებლიედ აამუშავა. ეს მიზეზები ბევრს (მათ შორის მეც) ალბათ სასაცილოდ მოეჩვენება, თუმცა იაპონელებს რას გაუგებ, მათთვის სავარაუდოდ ეს დიდი დანაშაულია;

ამავე დროს ტოკიოში მიმდინარეობს ძიგარო კანოს მემორიალი, რომელსაც „დიდი სლემის" სტატუსი აქვს. 60 კგ-ში ლუხუმ ჩხვიმიანი ცდიდა ძალებს, პირველი ბრძოლა მოიგო კიდეც, მაგრამ მერე გამოცდილ კორეელ ვონ ჩინ კიმთან დამარცხდა. 66 კგ-ში ჩვენებს მონაწილე არ ჰყოლიათ. 81 კგ წონით კატეგორიაში უშანგი მარგიანი მერვედფინალში ამერიკელ ტრევის სტივენსთან დამარცხდა; ეს ის სტივენსია ლონდონის ოლიმპიადაზე ავთანდილ ჭრიკიშვილს რომ აჯობა. ავთანდილმა თავისი და მეგობრის ჯავრი დამამშვიდებლის ფინალში იყარა. ულამაზესი გდებით დააიპონა ამერიკელი და ბრინჯაოს მედალი მოიპოვა.

ძიგარო კანოს მემორიალი 1 დეკემბერს დასრულდება. ქართველთაგან კიდევ იჭიდავებენ: ვარლამ ლიპარტელიანი, ალექსანდრე მსხალაძე, ლევან მატიაშვილი და გიორგი ზაქარიაძე.