„ღოღეთში დაიწყო ბოძების ჩასმა და შემდეგ მავთულხლართების გაბმა. ეს პროცესი არ შეჩერებულა და გრძელდება და ამის შესახებ ინფორმაცია მოგვაწოდა თვითონ რუსულმა მხარემ", - ამის შესახებ შს სამინისტროს საინფორმაციო ანალიტიკური დეპარტამენტის უფროსმა დავით სუჯაშვილმა განაცხადა.
მისი თქმით, ევროკავშირთან ასოცირების ხელშეკრულების ხელმოწერამდე რუსეთის მხრიდან პროვოკაციები სავსებით მოსალოდნელია.
„ნუ დაგვავიწყდება, რომ საქართველოს ტერიტორიები არის ოკუპირებული. რუსული ჯარი დგას ჩვენს ტერიტორიაზე, ამიტომ პროვოკაციებს არ გამოვრიცხავ. ჩვენი მთავარი მიზანია ამისთვის მზად ვიყოთ", - აღნიშნა დავით სუჯაშვილმა.
დღეს, შინაგან საქმეთა სამინისტროს საინფორმაციო ანალიტიკური დეპარტამენტის წარმომადგენლებმა დიპლომატიურ მისიებს საოკუპაციო ზოლში არსებული ვითარება გააცნეს და
ოკუპაციის ხაზის მიმდებარე სოფლებში არსებული ვითარებისა და მდგომარეობის შესახებ იმსჯელეს.
