„საქართველოს აქვს ამბიცია, რომ შექმნას ცოდნაზე დამყარებული ეკონომიკა, გამოიყენოს ქვეყნის მასშტაბით არსებული ყველა რესურსი და ახლა, კიდევ უფრო განვითარებული მომავლისკენ შემდეგი ნაბიჯი ჩვენს ქვეყანაში ტექნოლოგიების ბიზნესის განვითარებაა“, - ამის შესახებ საქართველოს პარლამენტის თავმჯდომარემ Startup Grind-ის ტექნოლოგიურ კონფერენციაზე განაცხადა.

რეგიონის ყველაზე მასშტაბური სტარტაპ ღონისძიება მისასალმებელი სიტყვით არჩილ თალაკვაძემ გახსნა. პარლამენტის თავმჯდომარემ სტარტაპის მნიშვნელობაზე ისაუბრა და ყურადღება მეტი ინოვაციის, კრეატიულობისა და ურთიერთკავშირების საჭიროებაზე გაამახვილა.

„თაობებმა თავისი საქმე გააკეთეს - იბრძოლეს თავისუფლებისთვის, განავითარეს მეცნიერება და ინდუსტრია, გამოიგონეს მანქანები და თვითმფრინავები. ახლა ჩვენი ჯერია, რომ ვიყოთ გამომგონებლები, შევქმნათ ახალი ბიზნესი. ვიცით, რა არის საჭირო კონკურენტუნარიანი განათლების სისტემისთვის, ძლიერი ეკონომიკისა და თანამედროვე მმართველობისთვის და გვაქვს ამბიცია, რომ საქართველო ბიზნესის წარმოებისთვის ერთ-ერთ საუკეთესო ადგილად ვაქციოთ. მიზნების მისაღწევად გვჭირდება უფრო მეტი ინოვაცია, მეტი ურთიერთკავშირი, უფრო აქტიური საზოგადოების ჩამოყალიბება, მსოფლიოს ჩვენი ნაწილი უნდა ავაშენოთ გლობალური კონტექსტის გააზრებით და მომავლის ხედვით“, - განაცხადა პარლამენტის თავმჯდომარემ.

მისივე თქმით, ამ მიზნის მისაღწევად, საქართველომ ეფექტური ნაბიჯები უკვე გადადგა და სტარტაპერებისთვის მნიშვნელოვანი მოტივაცია შექმნა, მათ შორის, გადასახადების შემცირება, სტარტაპ კაპიტალზე მარტივი წვდომის შესაძლებლობა და საჯარო სისტემის მოდერნიზება.

„თქვენ შეგიძლიათ, 20 წუთში იპოვოთ ოფისი, მოძებნოთ ნებისმიერი სახის ინფორმაცია, დარეგისტრირდეთ და წამოიწყოთ საკუთარი ბიზნესი. ჩვენი სერვისების გაციფრულებით, გამჭვირვალეობითა და მომხმარებელზე მორგებული მომსახურებით გავხსენით ახალი კარები, ახალი შესაძლებლობები და კიდევ მეტია სამუშაო ამ მიმართულებით. ჩვენ ვავითარებთ ინფრასტრუქტურას და ვაკეთებთ ჩვენი ეკონომიკის მეტ ინტეგრაციას გლობალურ ბაზრებში“, - აღნიშნა არჩილ თალაკვაძემ.

სიტყვით გამოსვლისას, პარლამენტის თავმჯდომარემ ყურადღება გაამახვილა ეკონომიკურ რევოლუციაში ინტერნეტის როლზეც და კიდევ ერთხელ გაუსვა ხაზი ინოვაციურობისა და შემოქმედობითობის განვითარების მნიშვნელობას.

„30 წლის წინ არავინ იცოდა, რომ ინტერნეტი, საბოლოო ჯამში, ეკონომიკურ რევოლუციას გამოიწვევდა, მაგრამ ეს მოხდა. დღესაც არავის შეუძლია სრულად განჭვრიტოს, თუ რა იქნება შემდეგი ეკონომიკური გარღვევა, რომელიც გამოიწვევს ახალი სამუშაო ადგილების შექმნას. ამიტომ, გვჭირდება ახალი ექსპერიმენტები, შესაძლებლობების აღმოჩენა. ის, რისი გაკეთებაც შეგვიძლია ყველა სხვა დანარჩენზე უკეთ, ეს არის კრეატიულობის, შემოქმედებითობის, წარმოსახვის განვითარება, განსაკუთრებით ახალგაზრდებში, რადგან მათ ყველაზე მეტად ესმით მომავლის ხმა. საქართველო მზად არის, უზრუნველყოს მეტი შესაძლებლობები თქვენთვის“, - განაცხადა არჩილ თალაკვაძემ.​