პარლამენტის იურიდიულ საკითხთა კომიტეტის თავმჯდომარე ანრი ოხანაშვილი საარჩევნო სისტემაზე ოპოზიციასთან მოლაპარაკებების მეხუთე რაუნდთან დაკავშირებით აცხადებს, რომ მმართველმა გუნდმა საკუთარი შეთავაზება უკვე გააკეთა და მოლაპარაკებებზე საპარლამენტო უმრავლესობა უცვლელი წინადადებით მიდის.

„რაც შეეხება მოლაპარაკებებს და შეხვედრების მორიგ რაუნდს, ჩვენ გვაქვს ერთი კონკრეტული შეთავაზება გაკეთებული, ეს არის 100 პროპორციული წესით, 50 კი მაჟორიტარული სისტემით არჩევა. ეს არის ის მოდელი, რომელიც უზრუნველყოფს ჩვენი ქვეყნის შემდგომ სტაბილურ განვითარებას, ეს არის ჩვენი ქვეყნის ინტერესებზე ორიენტირებული. ამ ადამიანებმა ან უნდა მიიღონ ეს შეთავაზება და დაეთანხმონ პროცესს, ვინაიდან ჩვენ 73 მაჟორიტარის ნაცვლად, ვთავაზობთ 50 მაჟორიტარს და პროპორციული სისტემით არჩევის რაოდენობას ვზრდით, ეს არის ის ნაბიჯი, რომელიც  ჩვენი მხრიდან სწორია, თუ ამას არ იზიარებენ, ეს არის ვიწრო პოლიტიკური პარტიული ინტერესი და მაშინ, ეს ყველაფერი მიანიშნებს იმაზე, რომ რაც უნდა შევთავაზოთ, საბოლოოდ მაინც არ დაეთანხმებიან, რაღაც სხვა სცენარით ფიქრობენ და ცდილობენ, განავითარონ მოვლენები“, - განაცხადა ანრი ოხანაშვილმა.