ზესტაფონის მუნიციპალიტეტში, სახელმწიფო პროგრამის „დანერგე მომავალი“ ფარგლებში კენკროვანი კულტურების ბაღების გაშენების პროცესი აქტიურად მიმდინარეობს. კორონავირუსის პანდემიის საპრევენციო ღონისძიებების ფარგლებში, სამუშაო პროცესი, ჯანდაცვის სამინისტროს მიერ მიღებული რეკომენდაციების გათვალისწინებით ხორციელდება.

სახელმწიფო პროგრამაში, რომელიც კენკროვანი კულტურების გაშენების მხარდაჭერას ითვალისწინებს, 20-მდე ადგილობრივი ფერმერია ჩართული.

სოფლებში - ტაბაკინში, მეორე სვირსა და როდინაულში კენკროვანი კულტურების გაშენების პროცესს ზესტაფონის მაჟორიტარი დეპუტატი შალვა კიკნაველიძე ადგილობრივი ხელისუფლების წარმომადგენლებთან ერთად გაეცნო და იმედი გამოთქვა, რომ პროექტში სამომავლოდ კიდევ უფრო მეტი ადგილობრივი ფერმერი ჩაერთვება.

„დანერგე მომავალი“ „ქართული ოცნების“ ხელისუფლების წარმატებული პროექტია. ჩვენი ერთ-ერთი მთავარი პრიორიტეტი სოფლის მეურნეობის დარგის მაქსიმალური ხელშეწყობაა, რამაც მნიშვნელოვნად უნდა გააუმჯობესოს სოფლად მცხოვრები მოსახლეობის სოციალურ-ეკონომიკური მდგომარეობა. ჩვენი მიზანია ხელი შევუწყოთ ადგილობრივ წარმოებას და შევამციროთ იმპორტი. იმედი მაქვს მომავალში უფრო მეტი ადგილობრივი ფერმერი ჩაერთვება პროექტში, შეიქმნება მეტი სამუშაო ადგილი და ბაზარზე გვექნება ადგილობრივი წარმოების ჯანსაღი პროდუქტი“, - განაცხადა უმრავლესობის დეპუტატმა.

კენკროვანი კულტურების დაფინანსების ქვეკომპონენტი, ფერმერებისთვის მიზნობრივი ფულადი დახმარების გამოყოფას ითვალისწინებს. ბაღების გაშენებისთვის საჭირო ნერგების, სარწყავი სისტემის მოწყობასა და სხვა საჭირო მასალების შეძენას სახელმწიფო პროგრამა 100 % აფინანსებს.​