„NATO-ს მინისტერიალი, რომელიც რამდენიმე დღის წინ დასრულდა, საქართველოსთვის მნიშვნელოვანი და შედეგის მომტანი აღმოჩნდა“, -  ამის შესახებ დემოკრატიული ცვლილებების ცენტრის თავმჯდომარე დავით ჩიხელიძე აცხადებს.

მისი თქმით, NATO-მ გამოთქვა მზაობა, რომ მისი თითოეული წევრი სახელმწიფო გააძლიერებს საქართველოსთან თანამშრომლობას, გადაიდგმება პრაქტიკული ნაბიჯები, რომელიც რეალობად აქცევს საქართველოს სურვილს, გახდეს ნატოს წევრი:

„პირველ რიგში მოხდა ხაზგასმა, რომ საქართველო NATO-სთვის წარმოადგენს სტრატეგიულ, მნიშვნელოვნად პარტნიორს, რომელიც მასზე ნაკისრი ვალდებულებების ერთგულია და აღებულ კურსს განუხრელად იცავს. მინისტერიალზე იმსჯელეს და დაამტკიცეს NATO-საქართველოს განახლებული „არსებითი პაკეტი“, რომელიც ზრდის საქართველოს თავდაცვის უნარიანობას და აახლოებს NATO-სთან, ასევე მოხდა „NATO 2030 სტრატეგიის“ დამტკიცება, სადაც ხაზგასმულია რეგიონში საქართველოს მნიშვნელოვანი როლი. NATO-მ გამოთქვა მზაობა, რომ მისი თითოეული წევრი სახელმწიფო, გააძლიერებს საქართველოსთან თანამშრომლობას, გადაიდგმება პრაქტიკული ნაბიჯები, რომელიც რეალობად აქცევს საქართველოს სურვილს, გახდეს NATO-ს წევრი!

NATO-მ კიდევ ერთხელ გაუსვა ხაზი საქართველოს ტერიტორიულ მთლიანობას. NATO-ს წევრმა სახელმწიფოებმა მკაფიოდ დააფიქსირეს საკუთარი პოზიცია, რომ პატივს სცემენ და აღიარებენ საქართველოს საერთაშორისოდ აღიარებულ საზღვრებს, საქართველოს ტერიტორიულ მთლიანობას. მინისტერიალზე მიღებული განახლებული „არსებითი პაკეტი“, რომელიც საქართველომ პირველად 2014 წელს მიიღო, ადასტურებს, რომ საქართველო როგორც სახელმწიფო, სწორ გზაზე დგას და ჩვენს ქვეყანაში მყარია დემოკრატია, რომელიც მუდმივ განვითარებას და სრულყოფას განიცდის. საქართველოს NATO-ს სტანდარტებთან თავსებადობის კუთხით დიდი პროგრესი აქვს, რაშიც დიდია საქართველოს თავდაცვის სამინისტროს და პირადად მინისტრ ირაკლი ღარიბაშვილის როლი, რომელმაც მინისტრობის პირველივე დღიდან, არაერთი მნიშვნელოვანი პროექტი დაიწყო/განახორციელა,(ინფრასტრუქტურის განვითარება, ახალი სატრანსპორტო პოლიტიკა, ახალი სადაზღვევო პაკეტი ჯარისკაცებისთვის, ხელფასების ზრდა და ა.შ.) რომელიც NATO-ს სტანდარტებთან თავსებადობის ზრდას და მთავარი მიზნის, NATO-ს წევრობის მიღწევას ემსახურება!“- აღნიშნავს დავით ჩიხელიძე.