„მივმართავ ჩვენს რადიკალურ ოპოზიციას, მგონია, რომ ჩვენ, როგორც არასდროს ისე გვჭირდება არა ქაოსი და დაძაბულობა, არამედ სწორი და მდგრადი განვითარება და ეს მიიღწევა იმ შემთხვევაში, თუ ეს გაუთავებელი აქციები, გადაკეტვები, პიკეტები და დაძაბულობა არ შეიქმნება. ეს მხოლოდ და მხოლოდ რუსეთის ინტერესის სფეროა. ნუ იქნებით მსახურნი ჩვენი მტრების. ვისურვებდი, რომ თუ შერიგება გინდათ და ეს ფარსი არ არის, რაც აქ ჩემი კოლეგების მხრიდან ითქვა, კეთილი ინებეთ და ჯერ მოსახლეობას მოუხადეთ ბოდიში, იქ მოინანიეთ, იქ მიიღეთ, იქ დაიმსახურეთ პატივი და ამის შემდეგ შეგვიძლია უკვე ვილაპარაკოთ ნორმალურ განვითარებაზე“,- ამის შესახებ საპარლამენტო უმრავლესობის წევრმა, ირაკლი ზარქუამ პარლამენტის პლენარულ სხდომაზე განაცხადა.

ირაკლი ზარქუამ იმ დადებით ტენდენციებზე გაამახვილა ყურადღება, რაც ეკონომიკაში შეინიშნება და აღნიშნა, რომ ეს მაჩვენებლები იძლევა საფუძველს იმის სათქმელად, რომ ეკონომიკა გამოდის სტაგნაციიდან და ეკონომიკური პოლიტიკა არის სწორი.

მისივე თქმით, ამის დამსახურებაა, რომ საერთაშორისო ორგანიზაციები, სავალუტო ფონდი თუ მსოფლიო ბანკი ზუსტად ეხმიანებიან, სწორ და ადეკვატურ შეფასებას აძლევენ იმ ეკონომიკურ პოლიტიკასა და მონაცემებს, რაც ხელისუფლებას აქვს წარმოდგენილი.

„სწორი მიმართულებით ვითარდება ეკონომიკა და ექსპორტის ზრდა არ არის მხოლოდ ციფრებით გამოხატული, ეს იმაზეც მიუთითებს, რომ მომავალი წლის ბიუჯეტი, რომელსაც უახლოეს მომავალში დავამტკიცებთ, გაზრდილი გვაქვს და დაახლოებით 19 მილიარდ ლარზე მეტს დახარჯავს მომავალ წელს ჩვენი სახელმწიფო. სწორი მაკროეკონომიკური პოლიტიკის გატარების შედეგად ჩვენ შევძელით, რომ საგარეო ვალი შემცირებულია 61 %-დან 52 %-მე. დეფიციტური ხარჯვა შემცირებულია 9,6 %-დან 4,2 %-მდე. მთლიანი შიდა პროდუქტის ზრდა ჩვენ მომავალ წელს დაგეგმილი გვაქვს 65 მილიარდ ლარამდე და ეს ყველაფერი მაძლევს საფუძველს ვთქვა, რომ დიახ, ეკონომიკა გამოდის სტაგნაციიდან და ეკონომიკური პოლიტიკა არის სწორი და ამის დამსახურებაა, რომ ის საერთაშორისო ორგანიზაციები, სავალუტო ფონდი თუ მსოფლიო ბანკი ზუსტად ეხმიანებიან და სწორ და ადეკვატურ შეფასებას აძლევენ იმ ეკონომიკურ პოლიტიკას და მონაცემებს, რაც ჩვენ გვაქვს წარმოდგენილი“, - განაცხადა ირაკლი ზარქუამ.