უკრაინის პრეზიდენტმა, ვოლოდიმირ ზელენსკიმ, ირანული დრონებით კიევზე თავდასხმის შესახებ საუბრისას განაცხადა, რომ აგრესორი ქვეყნის ლიდერს, ვლადიმირ პუტინს შეუძლია კიდევ ერთი „მიღწევა“ ჩაიწეროს - მან კიდევ ერთი ორსული ქალი მოკლა.

„კიევში მათ ახალგაზრდა ოჯახი მოკლეს, საცხოვრებელ კორპუსს ირანული „შაჰიდი“ დაარტყეს. ბიჭი და ორსული გოგონა. ვლადიმირ პუტინს შეუძლია კიდევ ერთი „მიღწევა“ ჩაიწეროს - მან კიდევ ერთი ორსული მოკლა“, - აღნიშნა უკრაინის პრეზიდენტმა.

კიევზე დრონებით თავდასხმას, სულ მცირე, 4 ადამიანი, მათ შორის ორსული ქალი ემსხვერპლა. ამის შესახებ კიევის მერმა, ვიტალი კლიჩკომ განაცხადა.

17 ოქტომბერს, კიევში 06:23 საათზე საჰაერო თავდასხმის განგაში გამოცხადდა. მოგვიანებით ცნობილი გახდა, რომ რუსმა ოკუპანტებმა კიევს კამიკაძე დრონებით შეუტიეს.