თბილისის მერის მოადგილემ ირაკლი ლექვინაძემ მოსამართლე ნატა ნაზღაიძის ოჯახის მიერ მილიონი ლარის კომპენსაციის მიღების საკითხზე განაცხდა, რომ კომპენსაცია, რომელიც სტიქიის ზონაში მდებარე მიწის ნაკვეთზე გაიცა, სამართლებრივად გამართულია.

მისი თქმით, ნაკვეთი არ წარმოადგენდა საცხოვრებელ ტერიტორიას, თუმცა აღნიშნულ ადგილზე მემორანდუმით საინვესტიციო ვალდებულება იყო განსაზღვრული.

„თბილისის მერიის სახელით, მინდა განვაცხადო, რომ დოკუმენტი, რომლის საფუძველზეც არის განხორციელებული აღნიშნული ოპერაცია, გახლავთ სამართლებრივად აბსოლუტურად გამართული და ის ეფუძნება იმ კანონმდებლობით გათვალისწინებულ მექანიზმებს, რომელიც არის განსაზღვრული ჩვენს ქვეყანაში. პირველ რიგში, მინდა გავაკეთო განმარტება ერთ მილიონ ლართან დაკავშირებით. ეს არის თანხის მოცულობა, რომლითაც განსაზღვრულია და შეფასებულია 1624 კვ. მეტრის მიწის ნაკვეთის ღირებულება, რომელიც მდებარეობს სტიქიური უბედურების ზონაში. ამ ნაკვეთის დათმობის სანაცვლოდ, მისმა მფლობელმა მიიღო ნაწილობრივ მიწის ნაკვეთი, დაახლოებითი 515 ათასი ლარის ღირებულების და დარჩენილი სხვაობა, დაახლოებით 455 ათასი ლარი, ანაზღაურებულ იქნა საბანკო ანგარიშზე თანხის ჩარიცხვით. აღნიშნული ნაკვეთი მდებარეობდა სტიქიური უბედურების ზონაში. ის, მართალია, არ წარმოადგენდა საცხოვრებელ ტერიტორიას, მაგრამ ეს იყო ადგილი, სადაც საინვესტიციო ვალდებულება იყო განსაზღვრული მემორანდუმით და რადგანაც იქ სტიქიამდე გარკვეული ეკონომიკური აქტივობა იყო დაშვებული, სწორედ ამიტომ იქნა აღნიშნული გადაწყვეტილება მიღებული", - განაცხადა ირაკლი ლექვინაძემ.

ლექვინაძის თქმით, მსგავს პრეცედენტს აქამდეც ჰქონდა ადგილი და ამის მაგალითად მერის მოადგილემ თამაზ და მინდია ელიზბარაშვილების ქონება დაასახელა.

„ზუსტად ანალოგიური პროცესი განხორციელდა თამაზ და მინდია ელიზბარაშვილების ქონების გამოსყიდვის შემთხვევაშიც, როდესაც მათი ქონებაც სამხარაულის ექსპერტიზის მიერ შეფასებულ იქნა დაახლოებით მილიონ-ნახევარ ლარად და ამ თანხის ნაწილი ანაზღაურებულ იქნა მიწის ნაკვეთებით და ნაწილი ფულადი ანაზღაურებით. ამიტომ, ნებისმიერი საუბარი იმასთან დაკავშირებით, რომ აქ რაიმე სამართალდარღვევით არის გაკეთებული, არის აბსოლუტურად შეუსაბამო რეალობასთან და ეს არის ძირითადად პოლიტიკური ინტერპრეტაციების მთავარი თემა. მე კიდევ ერთხელ ვაკეთებ განმარტებას და ვაცხადებ, რომ სამართლებრივად დოკუმენტაცია არის გამართული", - განაცხადა ირაკლი ლექვინაძემ.