ხორვატიის პრემიერ-მინისტრის, ანდრეი პლენკოვიჩის თქმით, საქართველოს და უკრაინას ოკუპირებული ტერიტორიების რეინტეგრაციისთვის ხორვატიის გამოცდილების გამოყენება შეუძლიათ. ეს განცხადება ანდრეი პლენკოვიჩმა მიუნხენის უსაფრთხოების კონფერენციაზე გამოსვლისას გააკეთა.

მისი თქმით, ხორვატიას ტერიტორიების რეინტეგრაციაში დაეხმარა გადაწყვეტილებები, რომლებიც „ზეწოლასა და დიპლომატიაზე“ იყო დაფუძნებული.

„ჩვენ გვქონდა ორი გამოსავალი – სამხედრო და დიპლომატიური. გამოსავალმა, რომელიც დაფუძნებული იყო ზეწოლასა და დიპლომატიაზე, ჩვენი ტერიტორიების რეინტეგრაცია მოიტანა“,- განაცხადა ანდრეი პლენკოვიჩიმ.

სიტყვით გამოსვლაში ხორვატიის მთავრობის მეთაურმა მხარი დაუჭირა საქართველოსა და უკრაინის ევროკავშირსა და NATO-ში ინტეგრაციას.

„საქართველო და უკრაინა ევროკავშირისა და NATO-ს წევრები რომ ყოფილიყვნენ, ამ ქვეყნებში სიტუაცია სულ სხვანაირი იქნებოდა“, -  აღნიშნა პლენკოვიჩმა.