„თქვენ თქვენივე პოზიციით ცდილობთ, პოლიტიკური დღის წესრიგი საქართველოში იყოს წარსულზე ორიენტირებული და ეს არის ძალიან ცუდი“, - ასე მიმართა პარლამენტში გამოსვლის დროს დასკვნით სიტყვაში ოპოზიციას პრემიერ-მინისტრმა მამუკა ბახტაძემ.

მამუკა ბახტაძემ სიღარიბის მაჩვენებელზე ისაუბრა და საერთაშორისო რეიტინგების მონაცემები გაიხსენა. ბახტაძის თქმით, იმის ნაცვლად, რომ დღეს ოპოზიციას ჰქონოდა არგუმენტირებული, თუნდაც მწვავე კითხვები, მან დღეს მოისმინა „ის რაც მოისმინა“.

„არაერთხელ განვაცხადე, რომ საქართველოს ჰყავს ორი მტერი-ეს არის რუსული ოკუპაცია და სიღარიბე. ჩვენ სიღარიბეს ამ მასშტაბის ყველაზე მტკივნეულ გამოწვევად ვთვლით ჩვენი ქვეყნისთვის და ჩვენი ეკონომიკური პოლიტიკა მთლიანად არის ფოკუსირებული სწორედ იმაზე, რომ სიღარიბე იქნას დაძლეული. დავუბრუნდეთ საერთაშორისო რეიტინგებს, ბიზნესს თურმე საქართველოში ატერორებენ. თუ ეს ასეა, კითხვა მაქვს თქვენთან „Doing Business“-ის რეიტინგში მსოფლიოში საქართველო როგორ არის მე-6 ადგილზე. თუ მართლა იმის განცდა გაქვთ, რომ მსოფლიო ბანკში ჩავაწყეთ ჩვენთვის ამ რეიტინგის მონიჭება? რამდენიმე კვირის წინ სარეიტინგო სააგენტო FITCH-მა გააუმჯობესა საქართველოს სუვერენული რეიტინგი, ეს იმას ნიშნავს, რომ საქართველოს მოქალაქეებს ექნებათ წვდომა უფრო იაფ კრედიტზე და ბევრი დადებითი ფაქტორი ექნება ყველაფერ ამას. იმის ნაცვლად , რომ ციფრებზე, არგუმენტებზე დაყრდნობით მსჯელობა მოვისმინოთ და ყველაზე მწვავე კრიტიკაც კი , დღეს ჩვენ მოვისმინეთ და დავინახეთ ის რაც დავინახეთ. სიმართლე გითხრათ, მოლოდინიც მე ისევე როგორც საზოგადოების დიდ ნაწილს სწორედ ასეთი ჰქონდა.

ჩვენ გვსურს, რომ დღის წესრიგი იყოს მომავალზე ორიენტირებული, ორიენტირებული იმაზე თუ როგორ დავიცვათ ჩვენი ეროვნული ინტერესები და დავძლიოთ ის გამოწვევები, რომელზეც ვსაუბრობთ. მაგრამ თქვენ თქვენივე პოზიციით ცდილობთ, პოლიტიკური დღის წესრიგი საქართველოში იყოს წარსულზე ორიენტირებული და ეს არის ძალიან ცუდი“, -განაცხადა მამუკა ბახტაძემ.

შეგახსენებთ, რომ პრემიერ-მინისტრი ბახტაძე, ინტერპელაციის წესით პარლამენტში ფრაქცია „ნაციონალურმა მოძრაობამ“ დაიბარა. ფრაქციას კითხვები ქვეყანაში კრიმინოგენური ვითარების საკითხთან დაკავშირებით ჰქონდა.