დუშეთის გზაზე, სადაც ავტოსაგზაო შემთხვევა მოხდა სავარაუდოდ ხუთი ადამიანი დაიღუპა, აქედან ორი არასრულწლოვანია.

როგორც პირველი არხის ჟურნალისტი ადგილიდან იუწყება, სატვირთო მანქანაზე, რომელიც ხრამში გადავარდა, სავარაუდოდ 13 ადამიანი იმყოფებოდა, შემთხვევის დროს ხუთმა მათგანმა გადმოხტომა მოახერხა.

სამი ადამიანი მაშველებმა გადაარჩინეს და ისინი გადაყვანილები არიან თელავის ჰოსპიტალში. საგანგებო სიტუაციის მართვის სამსახურის თანამშრომლები ადგილზე სამძებრო სამუშაოებს აგრძელებენ.

ამასთან, როგორც შსს-ში აცხადებენ, ამ ეტაპზე დადგინდა, რომ ავტოსაგზაო შემთხვევის დროს სამგზავრო მიკროავტობუსის მძღოლმა ვერ დაიმორჩილა საჭე და გზიდან, ხევში გადავარდა.

„შემთხვევის შედეგად არიან დაშავებულები. ამ დროისთვის მიმდინარეობს აქტიური სამაშველო ღონისძიებები“, – აღნიშნულია შინაგან საქმეთა სამინისტროს ოფიციალურ ინფორმაციაში.