„2008 წლის აგვისტო „ნაციონალური მოძრაობისა“ და სააკაშვილის ყველაზე დიდი დანაშაული და მოღალატეობრივი საქციელია“,- ამის შესახებ რეგიონული მართვის მიმართულების ხელმძღვანელმა სოზარ სუბარმა ტელეკომპანია „იმედის“ ეთერში განაცხადა.

სუბარმა ომის წინ, 2008 წლის ომის დღეებში და მის შემდეგ მიმდინარე პროცესებს „მოღალატეობრივი პოლიტიკა“ უწოდა და აღნიშნა, რომ ევროსაბჭოს 2 ოქტომბრის რეზოლუციის მხარდაჭერით, ერთიანი „ნაციონალური მოძრაობის“ დელეგაციამ გამოაცხადა, თითქოს საქართველო დამნაშავე იყო ომის დაწყებაში - „ეს არის ჩვეულებრივი ღალატის ანატომია“.

მისი თქმით, სააკაშვილს რაღაცის ეშინია და ცდილობს, ისე დახატოს სიტუაცია, თითქოს ჰააგაში ქართველ ჯარისკაცებს რაღაც ემუქრებათ. სინამდვილეში კი პირიქითაა და ეს სასამართლო იქნება განაჩენი რეალურად ოკუპანტისთვის, ამას ყველაზე კარგად რუსეთი ხედავს.

„სინამდვილეში არის პირიქით. ეს სასამართლო იქნება განაჩენი რეალურად ოკუპანტისთვის და ამას ყველაზე კარგად რუსეთი ხედავს. ქართველ ჯარისკაცებს რომ არაფრის შიში არ უნდა ჰქონდეთ, ცხადია, იმიტომ, რომ ისინი იცავდნენ თავის სამშობლოს და მათი გამართლება იქნება სწორედ ამ სასამართლოს გადაწყვეტილება“, - თქვა სუბარმა.

სოზარ სუბარის თქმით, „ნაციონალური მოძრაობისა“ და სააკაშვილის ყველაზე დიდი დანაშაული, ყველაზე მოღალატეობრივი საქციელი ქართველი ხალხის წინაშე 2008 წლის აგვისტოა და ამ ღალატის შემადგენელი ნაწილია, როგორ მიატოვეს ხალხი. მან გაიხსენა, როგორ გავიდა სამხედრო შენაერთი ყველანაირი სროლის გარეშე კოდორის ხეობიდან იმ დროს, როცა მოსახლეობას დარჩენისკენ მოუწოდებდნენ.

სუბარისვე თქმით, პირადად გააფრთხილა კოდორში ყველა ნაცნობი, დაეტოვებინათ ხეობა. რომ არა ეს გაფრთხილება, მსხვერპლი იქნებოდა გაცილებით დიდი და ასე მოხდა დიდი ლიახვის ხეობაში, საიდანაც მოსახლეობა არათუ გამოიყვანეს, არც კი გაუფრთხილებიათ.