ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი საპარლამენტო კომისიის თავმჯდომარემ, ირაკლი ბერაიამ და კომისიის წევრმა, დიმიტრი ხუნდაძემ საოკუპაციო ხაზი მოინახულეს. დეპუტატები ხურვალეთში, გუგუტიანთკარსა და დიცში უსაფრთხოების და ჰუმანიტარული კუთხით არსებულ ვითარებას და  ადგილობრივი მოსახლეობის საჭიროებებს გაეცნენ.

„ჩვენი ქვეყნისთვის მთავარი გამოწვევაა ოკუპაცია და მზარდი მილიტარიზაცია. განსაკუთრებით შემაშფოთებელია საქართველოს მოქალაქეების მკვლელობის ფაქტები, მათი უკანონო დაკავებები, „ბორდერიზაციის“ უკანონო პროცესი, ისევე როგორც გადასასვლელი პუნქტების ჩაკეტვები, რაც უხეშად არღვევს ჩვენი მოქალაქეების ფუნდამენტურ უფლებებს. ასევე შემაშფოთებელია, ბოლო პერიოდში, სოფლებში გუგუტიანთკარსა და ჩორჩანაში განვითარებული მოვლენები, ისევე როგორც ოკუპირებულ სოფელ ერედვში საქართველოს მოქალაქეების ნასახლარზე ნაგავსაყრელის მოწყობის მიზნით მიმდინარე სამუშაოები. ეს არის ის საკითხები, რომლებსაც ჩვენი ხელისუფლების შესაბამისი უწყებები საერთაშორისო ფორმატებში მუდმივად აყენებენ და რა თქმა უნდა, ეს არის ის საკითხები, რომლებიც პრინციპულად და მწვავედ არის დასმული ჟენევის საერთაშორისო დისკუსიების ფარგლებში. აუცილებელია გაგრძელდეს საერთაშორისო საზოგადოების ძალისხმევის კონსოლიდაცია იმისთვის, რომ რუსეთის ფედერაციამ შეასრულოს ცეცხლის შეწყვეტის შეთანხმებით და საერთაშორისო სამართლით ნაკისრი ვალდებულებები“ - განაცხადა კომისიის თავმჯდომარე ირაკლი ბერაიამ.

საოკუპაციო ხაზის მიმდებარე სოფლებში მოსახლეობასთან შეხვედრისას, დიმიტრი ხუნდაძე ჰუმანიტარული და სოციალური საკითხებით დაინტერესდა.

„განსაკუთრებით მძიმე ვითარებაში არიან ის მოქალაქეები, რომლებიც საოკუპაციო ხაზის მიღმა დარჩნენ. მათთვის სოციალური პრობლემები კიდევ უფრო მწვავედ დგას, რადგან ვერ სარგებლობენ ჯანდაცვის არსებული პროგრამებით. ქვეყნის ტერიტორიული მთლიანობის აღდგენა ჩვენი უმთავრესი მიზანია. ამ ეტაპზე კი მნიშვნელოვანია, დავიცვათ აქ მცხოვრები მოსახლეობის უფლებები და მათი უსაფრთხოება“, - აღნიშნა დიმიტრი ხუნდაძემ.