„ინფრასტრუქტურული ტიპის პროექტები საჭიროებს უზარმაზარ ფინანსურ რესურსებს და გრძელვადიან ინვესტიციებს და რასაკვირველია ეს ყველაფერი უნდა გავხადოთ ეკონომიკურად და ფინანსურად სიცოცხლისუნარიანი და მდგრადი“ - ამის შესახებ ეკონომიკისა და მდგრადი განვითარების მინისტრმა ნათია თურნავამ აბრეშუმის გზის ფორუმის მიმდინარეობისას განაცხადა.

მინისტრის განცხადებით, საჭიროა ჩატარდეს ფინანსური, კომერციული და საინჟინრო კვლევები ინფრასტრუქტურულ პროექტებთან დაკავშირებით.

ნათია თურნავას თქმით, კერძო საჯარო პარტნიორობის შესახებ კანონი, რომელიც საქართველომ 2017 წელს მიიღო საშუალებას იძლევა ბიზნესი შეფასდეს სათანადოდ და არსებობდეს რისკების გაზიარების მექანიზმი, რაც მინისტრის შეფასებით, მეტი ფონდების მოზიდვის შესაძლებლობას  იძლევა ინფრასტრუქტურის განვითარებისთვის.

 „საჭიროა ჩავატაროთ ფინანსური, კომერციული  კვლევები პროექტთან დაკავშირებით, ასევე ტექნიკური და საინჟინრო კვლევები, ვინაიდან უმეტესობა ამ პროექტების ძალიან რთულია საინჟინრო თვალსაზრისით. კვლევები შეიძლება ჩატარდეს, თუმცა გარანტია იმისა რომ პროექტი იქნება 100%-ით  მდგრადი არ არსებობს.  ჩვენ გვაქვს კანონი კერძო საჯარო პარტნიორობის შესახებ, რომელიც ძალაში 2017 წელს შევიდა, რაც საშუალებას იძლევა კერძო ბიზნესი შეფასდეს სათანადოდ  და რისკის გაზიარების მექანიზმი არსებობდეს. აღნიშნული საშუალებას აძლევს კერძო ბიზნეს შემოაბიჯონ ასეთი  ტიპის პროექტებში, ამით უფრო მეტი ფონდები იქნება ხელმისაწვდომი ინფრასტრუქტურის განვითარებისთვის“, - აღნიშნა მინისტრმა.

ინფრასტრუქტურული პროექტების მდგრადობაზე საუბრისას, ნათია თურნავამ გარემოს დაცვის კომპონენტზეც გაამახვილა ყურადღება და აღნიშნა, რომ ქვეყანა ყოველთვის ამახვილებს ყურადღებას ეკოლოგიურად სუფთა ტექნიკურ გადაწყვეტილებების მიღების გზებზე.

„თუ განვიხილავთ გარემოს მდგრადობის და კლიმატური ცვლილების კუთხით, ეკონომიკის და მდგრადი განვითარების სამინიტრო ყურადღებას ამახვილებს მდგრად განვითარებაზე, ჩვენ ყოველთვის გვაქვს დღის წესრიგში ეს საკითხები, ყოველთვის ყურადღებას ვამახვილებთ ეკოლოგიურად სუფთა ტექნიკურ გადაწყვეტილების მიღების გზებზე. ასევე ისეთი ტრანსპორტის შექმნაზე როგორიცაა მაგალითად დ რკინიგზა და მგზავრთა ტრანსპორტირება სარკინიგზო ტრანსპორტით. ჩვენ ტურისტული ქვეყანა ვართ და აუცილებელია შევინარჩუნოთ და დავიცვათ ჩვენი ბუნება“, - განაცხადა ეკონომიკისა და მდგრადი განვითარების მინისტრმა.