აშშ-ში, ატლანტაში გამართულ საქართველოსა და ჯორჯიის შტატის ეროვნულ გვარდიებს შორის 25-წლიანი პარტნიორობისადმი მიძღვნილ ღონისძიებაზე საქართველოს თავდაცვის მინისტრს ირაკლი ღარიბაშვილს ოგლეტორპის ჯილდო გადაეცა.  ჯეიმს ედვარდ ოგლეტორპის სახელობის ჯილდო თავდაცვის უწყების ხელმძღვანელმა პირმა გამორჩეული სამსახურისთვის და საქართველოსა და აშშ-ის შორის ხანგრძლივი და მტკიცე სტრატეგიული პარტნიორობის ჩამოყალიბებაში შეტანილი წვლილისთვის მიიღო.

„სახელმწიფო სამსახურში მოღვაწეობის მრავალი წლის განმავლობაში ამერიკის შეერთებულ შტატებსა და საქართველოს შორის ხანგრძლივი და მტკიცე სტრატეგიული პარტნიორობისადმი ერთგულების, თავდადებისა და განვითარებისთვის გაწეული ღვაწლისთვის ჯილდოვდება საქართველოს თავდაცვის მინისტრი, ბატონი ირაკლი ღარიბაშვილი. როგორც შინაგან საქმეთა მინისტრი და შემდეგ - პრემიერ-მინისტრი, ის ყოველთვის ეძებდა და პოულობდა გზებს გაეძლიერებინა და განემტკიცებინა ურთიერთობები საქართველოსა და ამერიკის შეერთებულ შტატებს შორის. განსაკუთრებულია მისი წვლილი საქართველოსა და აშშ-ის ჯორჯიის შტატს შორის სტრატეგიული პარტნიორობის პროგრამისა და ურთიერთობის სხვა მრავალი საშუალების გამოყენებითა და ამოქმედებით ორმხრივი თანამშრომლობის წარმატებულად განხორციელებაში. როგორც თავდაცვის მინისტრი, ბატონი ირაკლი ღარიბაშვილი განსაკუთრებულ ძალისხმევას იჩენს გააძლიეროს საქართველოს თავდაცვისუნარიანობა და განამტკიცოს ქვეყნის შესაძლებლობები, რათა წვლილი შეიტანოს საერთაშორისო უსაფრთხოების ოპერაციებში. ეს მიღწევები, სამხედრო სამსახურის საუკეთესო ტრადიციების კვალდაკვალ, ასახავს მის პირად, საქართველოს თავდაცვის სამინისტროს და ქართული სახელმწიფოს უდიდეს  დამსახურებას“, - აღინიშნა ჯილდოს გადაცემისას.

საქართველოსა და აშშ-ის, ჯორჯიის შტატის ეროვნულ გვარდიებს შორის პარტნიორობის 25 წლის იუბილე საქართველოს თავდაცვის მინისტრის ატლანტაში ვიზიტის ფარგლებში აღინიშნა. ღონისძიება ეროვნული გვარდიის შტაბ-ბინაში გაიმართა, რომელიც საქართველოსა და აშშ-ის ეროვნული ჰიმნებით გაიხსნა. სტუმრებს ჯორჯიის შტატის ეროვნული გვარდიის მეთაური, გენერალ-მაიორი ტომას კარდენი მიესალმა და თანამშრომლობის მნიშვნელობას გაუსვა ხაზი.

ეროვნული გვარდიის შტაბ-ბინაში სიტყვით გამოსვლისას საქართველოს თავდაცვის მინისტრმა აშშ-საქართველოს წარმატებულ თანამშრომლობაში ყურადღება ოფიცრების, სერჟანტებისა და სამხედროების როლზე გაამახვილა და აღნიშნა, რომ სამაგალითო ურთიერთობა ძლიერი ალიანსის მყარ საფუძველს უზრუნველყოფს.

„ჩვენთვის უაღრესად დიდი მნიშვნელობა აქვს აშშ-თან ძლიერ სტრატეგიულ პარტნიორობას, რადგან ჩვენ ვიზიარებთ დემოკრატიულ ფასეულობებს, ვახორციელებთ სამხედრო მიმართულებით ტრანსფორმაციას და მივისწრაფვით NATO-ში ინტეგრაციისკენ. ამერიკა ჩემი ქვეყნის - საქართველოს ურყევი მხარდამჭერია. ყველა ქართველი თქვენი მადლიერია“,- განაცხადა ირაკლი ღარიბაშვილმა. 

სიტყვით გამოსვლისას თავდაცვის მინისტრმა აშშ-სა და საქართველოს შორის სამხედრო კუთხით არსებულ თანამშრომლობის მიმართულებებსა და მათ მნიშვნელობას გაუსვა ხაზი და იმედი გამოთქვა, რომ საქართველოს სტრატეგიული კავშირი აშშ-სთან კიდევ უფრო გაძლიერდება.

სტუმრებისთვის საქართველოსა და აშშ-ის შორის 25-წლიანი სამხედრო თანამშრომლობის შესახებ ვიდეოპრეზენტაციაც მოეწყო.