სარეკლამო კომპანია „პანდა“, რომელიც „ფეისბუქმა“ რამდენიმე დღის წინ გაუქმებულ პროსახელისუფლებო გვერდებთან დააკავშირა, ვიდეომიმართვას ავრცელებს.

„რამდენიმე დღეა ცილს გვწამებენ და ჩვენს შესახებ ავრცელებენ არასწორ ინფორმაციას.

რა მოხდა სინამდვილეში? გამოქვეყნდა ორი დამოუკიდებელი დასკვნა. ერთის ავტორია ოფიციალური „ფეისბუქი“, ხოლო მეორე ეკუთვნის ორ ქართველს ეთო ბუზიაშვილსა და გივი გიგიტაშვილს. „ფეისბუქი“ ამბობს ერთს, ეს ადამიანები კი მეორეს! მიკერძოებულმა „პროფესიონალმა“ ეთო ბუზიაშვილმა საკუთარი ვარაუდის და არა ფაქტების საფუძველზე დადო დასკვნა, რომლითაც 5 ბრალდებას გვიყენებს. მათგან „ფეისბუქი“ მხოლოდ ორს  ადასტურებს.  ბრალდება პირველი: ე.წ. ფეიკ-ნიუსების გავრცელება - „ფეისბუქი“ ამას არ ადასტურებს; ბრალდება მეორე: „მიკერძოებული პროფესიონალი“ ამტკიცებს,  რომ საზოგადოების გახლეჩვას ვცდილობდით - „ფეისბუქი“ ამას არ ადასტურებს; ბრალდება მესამე: „მიკერძოებული პროფესიონალი“ ბრალს გვდებს ანტიამერიკულ  პროპაგანდაში - „ფეისბუქი“ ამას არ ადასტურებს; რას ამბობს „ფეისბუქი“? ისინი წერენ, რომ ჩვენ სისტემურად ვმუშაობდით. დიახ, ეს ასეა - ჩვენ სოციალურ ქსელში ვფლობთ  და ვაქირავებთ რესურსებს.

„ფეისბუქი“ ამბობს, რომ ჩვენ კრიტიკულები ვიყავით ოპოზიციის მიმართ - დიახ, ჩვენ ამასაც ვადასტურებთ.  თუმცა, მიკერძოებულ დასკვნაში ეს პუნქტი მოხსენიებული იყო, როგორც  სიძულვილოს ენა და დისკრედიტაცია. რეალობა ასეთია - რასაც „ფეისბუქმა“ კრიტიკა უწოდა, მათ შავი პიარი დაარქვეს.  ყველაფერი ჩვენ მოგვაწერეს და გააზვიადეს. „ფეისბუქს“ არ უთქვამს, რომ პოსტების შინაარსის გამო დაგვბლოკა- მან დაგვბლოკა სისტემურობის გამო“, - ნათქვამია სარეკლამო კომპანია „პანდას“ ვიდეომიმართვაში.