წამყვანი ამერიკული უნივერსიტეტი, საერთაშორისო განათლების ლიდერი ვებსტერი (Webster University) რეგიონში პირველ კამპუსს საქართველოში, „სილიკონ ველი თბილისის“ ტერიტორიაზე გახსნის, სადაც ქვეყნის ყველაზე სწრაფად მზარდი და ინოვაციური უმაღლესი სასწავლო დაწესებულება – ბიზნესისა და ტექნოლოგიების უნივერსიტეტი (BTU) მდებარეობს, – ამის შესახებ ინფორმაციას ბიზნესისა და ტექნოლოგიების უნივერსიტეტის პრესსამსახური ავრცელებს.

მათივე ცნობით, ვებსტერის კამპუსები მსოფლიოს სხვადასხვა ქვეყანაში, მათ შორის ჰოლანდიაში, ავსტრიაში, შვეიცარიასა და საბერძნეთში მდებარეობს.

„ვებსტერის უნივერსიტეტის რეგიონში შემოსვლა ახალგაზრდებს მისცემს შესაძლებლობას, 2021 წლიდან ამერიკული განათლება და დიპლომი საქართველოში, ქვეყნის დატოვების გარეშე მიიღონ. ბიზნესისა და ტექნოლოგიების უნივერსიტეტის ინოვაციური პროგრამები და საერთაშორისო სტანდარტების შესაბამისი გადამზადების პროგრამა, მაღალი ხარისხი და მნიშვნელოვანი პარტნიორები, ძლიერი ტექნოლოგიური ბაზა, მაღალტექნოლოგიური ლაბორატორიები, შექმნილი ეკოსისტემა – ეს იმ მიზეზების ნაწილია, რის გამოც ამერიკულმა უნივერსიტეტმა არჩევანი ბიზნესისა და ტექნოლოგიების უნივერსიტეტსა და „სილიკონ ველი თბილისზე“ გააკეთა“, - აღნიშნულია გავრცელებულ ინფორმაციაში.

ვებსტერის უნივერსიტეტი 2000-მდე კვადრატული მეტრის ფართობზე „სილიკონ ველი თბილისის“ ტერიტორიაზე განთავსდება, სადაც ლაბორატორიები, აუდიტორიები, ბიბლიოთეკა და სამუშაო სივრცეები მოეწყობა.

„ფორბსის უნივერსიტეტების 2019 წლის ტოპ რეიტინგში შესული ვებსტერის უნივერსიტეტი დაარსების დღიდან, 1915 წლიდან ლიდერობს და დღეს ფლობს კამპუსებს ჩრდილოეთ ამერიკის, ევროპის, აზიისა და აფრიკის კონტინენტებზე.

2018 წელს, საზღვარგარეთ განხორციელებული პროგრამებით, ვებსტერი აშშ-ის მეოთხე სასწავლებელი გახდა „ამერიკის საუკეთესო უნივერსიტეტების“ რეიტინგში, სადაც აშშ-ის 1500 სასწავლებლიდან მხოლოდ 44 მოხვდა.

ვებსტერის რეპუტაციას განაპირობებს მრავალი გავლენიანი სარეიტინგო სისტემების მიერ, მისი როგორც აშშ-ის ერთ-ერთი საუკეთესო სასწავლების წარმოჩენა. ესენია: Washington Monthly, College NET, National Council for Accreditation of Teacher Education (NCATE), College Choice,  AccreditedSchoolsOnline.org, Military Times და სხვა“, - ნათქვამია ინფორმაციაში, რომელსაც ბიზნესისა და ტექნოლოგიების უნივერსიტეტი ავრცელებს.

წყარო :