"სიკეთის ქალაქი" სოციალურ ქსელში განცხადებას ავრცელებს, სადაც წერს, რომ პატარა ბიჭს, რომელსაც წვიმის დროს კარადაში ეძინა სახლს აუშენებენ. ოჯახი ყვარლის მუნიციპალიტეტის სოფელ თხილისწყაროში ცხოვრობს. 

"ძალიან სასიხარულო და მაგარი ამბები გვაქვს ამ ბავშვებთან დაკავშირებით. თქვენ, ყველამ ნახეთ პატარა ლევანიკოს ისტორია. ბიჭი, რომელსაც წვიმა არ უყვარს, რადგან წვიმის დროს კარადაში სძინავს, ის ყვარელის რაიონში სოფელ თხილისწყაროში ცხოვრობს. მამინაცვალის ძალადობას გამოქცეული თათიას ოჯახმა კი, პანკისის ერთ სოფელში, ვიღაცის მიტოვებულ სახლს, შეაფარა თავი.

გუშინ, კოკა-კოლას პრეზიდენტმა თემურ ჭყონიამ დაგვირეკა და ბავშვების მდგომარეობით დაინტერესდა. Coca-Cola Bottlers Georgia-ს ვუთხარით, რომ ხალხისაგან შეგროვებული თანხით, ამ ოჯახებისათვის საკვების მარაგის პრობლემა უკვე მოხსნილია, თუმცა არ მოხერხდა სახლის პრობლემის მოგვარება.. ლევანიკოს სახლი შეკეთებას არ ექვემდებარება, ხოლო თათიას ოჯახის მიერ ამავე სოფელში მოძებნილ ნაგეგობაზე ყვარელის მერიამ შესახლებაზე კი განაცხადა თანხმობა, მაგრამ ის შენობა საცხოვრებლად გამოუსადეგარია, რადგან მხოლოდ კედლები და სახურავია და მას რემონტი სჭირდება, რომ ბავშვებმა ადამიანურად იცხოვრონ.

ბატონმა თემურმა გვითხრა, რომ ლევანიკოს ოჯახს ის სახლს აუშენებს, თათიას და საბას იმ შენობას გაურემონტებს რომ ბავშვებმა მშვიდად და მოწესრიგებულად განაგრძონ ცხოვრება. მართლაც სიტყვები არ მყოფნის მადლობის სათქმელად.

''სიკეთეს არ სჭირდება აფიშირება და არც საქვეყნოდ მადლობა არ არის საჭირო''- მთხოვა ბატონმა თემურმა, თუმცა მე არ დავეთანხმე და დღეს, საჯაროდ ვწერ ამ ამბავს, რადგან ამდენი ნეგატივის ფონზე, ვთვლი, რომ ეს უმაგრესი ამბავი აუცილებლად უნდა იცოდეს ხალხმა. მადლობა ამ ღვთისნიერ კაცს, რომლის მეშვეობითაც ეს ბავშვები ნორმალურ პირობებში იცხოვრებენ.

ხვალ კახეთისაკენ მივდივარ... ბავშვებს ახალ, კარგ ამბებსაც მოვუყვები და ხალხისაგან შეგროვებულ საკვებს მივაწვდი... ასევე გავიგებ, რა და როგორ უნდა მოხერხდეს, რომ სახლის მშენებლობა დავიწყოთ, გზა და გზა მოგაწვდით ყველა ინფორმაციას სიკეთის ქალაქის ფესბუქ გვერდზე.

P.S. კასპში, უკვე დასრულებულია ალეკო ბუთხუზის სახლის რემონტი, რომელიც ასევე ბატონი თემურის დამსახურებაა. ხალხისაგან შეგროვებული საკვების მარაგიც უკვე ჩატანილია და ალეკო და მისი ოჯახი უზრუნველყოფილია.

ალეკოს ისტორიის შესახებ ვიდეოს, იხილავთ 15თებერვალს, მაია სტეფნაძის თოქ-შოუ ''სარკეში'' . დიდი მადლობა ქალბატონ მაიას, მან საშუალება მომცა, საჯაროდ მეთქვა მადლობა თითოეული თქვენგანისთვის.

ასე ერთად ერთმანის გადარჩენას შევძლებთ", - წერია განცხადებაში.

სიკეთის ქალაქის საინიციატივო ჯგუფი დაარსდა 2017 წლის თებერვალში.

"სიკეთის ქალაქი არის საინიციატივო ჯგუფი რომელიც ეხმარება უკიდურეს სიღატაკეში მცხოვრებ ბავშვებს და მოხუცებს. ეს ხალხის სიკეთის ჯგუფია" - ვკითხულობთ კომპანიის ოფიციალურ გვერდზე.

https://www.facebook.com/Siketisqalaqi/videos/819001041859772/