შინაგან საქმეთა მინისტრმა ვახტანგ გომელაურმა, საქართველოში მიგრაციის საერთაშორისო ორგანიზაციის (IOM) მისიის ხელმძღვანელთან, სანია ჩელებიჩ ლუკოვაცთან, ოფიციალური შეხვედრა გამართა.

შეხვედრაზე მხარეებმა საქართველოს შინაგან საქმეთა სამინისტროსა და მიგრაციის საერთაშორისო ორგანიზაციას შორის არსებული წარმატებული ურთიერთობა და თანამშრომლობის გაღრმავების შესაძლებლობები განიხილეს.

შინაგან საქმეთა მინისტრმა ხაზი გაუსვა საზღვრის ინტეგრირებული მართვის, არალეგალური მიგრაციის და ნებაყოფლობითი დაბრუნების საკითხებში მიგრაციის საერთაშორისო ორგანიზაციის მხარდაჭერას, რასაც იგი ევროკავშირისა და აშშ-ის დაფინანსებით ახორციელებს.

მხარეებმა საქართველოს შინაგან საქმეთა სამინისტროში მიმდინარე პროექტებზეც ისაუბრეს, რომლებიც მიგრაციის საერთაშორისო ორგანიზაციის უშუალო ჩართულობითა და მხარდაჭერით მიმდინარეობს.

ვახტანგ გომელაურმა, ასევე, აღნიშნა დაგეგმილი პროექტების მნიშვნელობა, რომელთა ფარგლებში განხორციელდება საპატრულო პოლიციის დეპარტამენტისა და სასაზღვრო პოლიციის თანამშრომელთა შესაძლებლობების განვითარება და დამატებით საჭირო აღჭურვილობის უზრუნველყოფა.

შინაგან საქმეთა მინისტრმა საქართველოში მიგრაციის საერთაშორისო ორგანიზაციის მისიის ხელმძღვანელს მადლობა გადაუხადა წლების განმავლობაში სხვადასხვა სფეროში, განსაკუთრებით კი საზღვრის ინტეგრირებული მართვის კუთხით გაწეული დახმარებისა და მხარდაჭერისთვის.